Маңғыстауда техникалық сабақтар тұрақты өткізіледі
Маңғыстау облысы бойынша меншікті тілші
Маңғыстау темір жолы бөлімшесінде жоспарлы және жоспардан тыс техникалық сабақтар тұрақты өткізіледі. Жақында Маңғыстау станциясы бастығының орынбасары Айбол Есмұхановтың ұйымдастыруымен кезекті техсабақ жүргізілді. Біліктілікті арттыру шарасы теориялық һәм практикалық түрде екі күн бойына жалғасты. Техникалық сабаққа Маңғыстау белгі беру және байланыс дистанциясынан ШНЦС-7 маманы О.Жұмабаев пен Маңғыстау жол дистанциясынан жол бапкері Қ.Дәулетбаев арнайы шақырылып, апатты, стандартты емес жағдайлар кезінде қызметкерлердің іс-әрекеті бойынша тәжірибелерімен бөлісті. Туындаған сұрақтарға жауап берді. Дәріске станция кезекшілері, парк және сұрыптау дөңесінің кезекшілері, пойыз құрастырушылар, вагон қозғалысының жылдамдығын реттеушілер және белгі берушілер қатысты. − Маңғыстауда жыл басында жарияланған «Кәсіби білімді арттыру» үш айлығы аяқталғанына қарамастан қызметкерлердің кәсіби біліктілігін, білімін және техникалық оқу сапасын одан әрі арттыру мақсатында осы техникалық сабақ жүргізілді. Өткен бес айда түбек теміржолында қозғалыс қауіпсіздігін бұзу жағдайы тіркелген жоқ. Яғни, мұны филиал қызметкерлерінің осы тұрғыда атқарып жатқан жұмыстары мен бүгінгідей іс-шаралардың жемісі деп білеміз. Сондықтан Маңғыстау темір жолының басшылығы Бейнеу, Сай-Өтес, Үстірт, Шетпе, Жетібай, Өзен, Болашақ сияқты қалған станциялар мен локомотив, вагон деполарында да осы іс-шараны жалғастыруға шақырады, – дейді Ақтөбе жүк тасымалы бөлімшесі Маңғыстау қосалқы бөлімінің қозғалыс қауіпсіздігі қызметінің бас маманы Асқат Шарапатдинов.