Сай-Өтес станциясындағы желілік полиция жолаушылар пойызында халықпен кездесті
Маңғыстау облысы бойынша меншікті тілші
Маңғыстау станциясындағы желілік полиция бөлімшесіне қарасты Сай-Өтес станциясындағы желілік полиция бөлімшесінің қызметкерлері жолаушылар пойызында халықпен кездесті. Кездесу Сай-Өтес станциясындағы желілік полиция бөлімшесінің қызмет көрсету аймағында үш күн бойына жалғасқан тәртіпсіздікке және құқық бұзушылыққа «мүлдем төзбеушілік» акциясының екінші кезеңі аясында өтті. Акцияның бірінші кезеңі жылдың басында ұйымдастырылып, онда осы станция аумағында жеті құқық бұзушылық дерегі анықталған еді. Бұл жолы полиция инспекторлары тек түсіндіру жұмыстарымен айналысты. − Акцияның алғашқы күнінде инспекторларымыз №109/110 «Ақтөбе-Маңғыстау» жолаушылар пойызын аралап, жолаушыларға қоғамдық орындарда бұзақылықтар мен вандализм көріністеріне жол бермеу, ортақ пайдаланылатын орындарды ластамау, саябақтар мен көшелердегі жарықшамдар мен мүліктерді бүлдірмеу туралы насихат жүргізді. Сонымен қатар ұсақ бұзақылық жасаған, ортақ пайдаланатын орындарды ластаған, халықтың тыныштығын бұзған және алкогольдік ішімдіктерді ішіп немесе қоғамдық орынға масаң күйде келген азаматтарды ҚР Әкімшілік құқық бұзушылық туралы кодексінің баптарына сай әкімшілік шараға тартылатындығы туралы ескертті, – дейді бұл туралы Сай-Өтес станциясы ЖПб бастығының міндетін атқарушы Нұрлыбек Рахметов.