Түрксіб станциясының теміржолшылары түгелдей вакцина алды
Жамбыл теміржолына қарасты тоғыз жолдың торабындағы Түрксіб станциясының теміржолшылары түгелдей дерлік вакцина салдырып үлгерді. Ұжымдағы жүз шақты қызметкердің дені денсаулықтарына жауапкершілікпен қарайтындарын аңғартып, екпе салдырды. Станция басшысы Тимур Қисановтың сөзіне қарағанда, олар түсіндірме жұмыстарын мұқият әрі сауатты ұйымдастырыпты. «Қауіпті індеттің зардабын әлем елдерімен бірге біздің аймағымыздың тұрғындары да сезінді. Рас, бастапқыда бәрімізде де күмән, сенімсіздік болды. Алайда, уақыт індетпен ойнауға болмайтындығын көрсетті. Қаншама замандастарымыздан айырылып қалдық, жақын-жұрағаттарымыз, туған-туыстарымыз көз жұмды. Алайда, біз «Қазақстан темір жолы» компаниясы басшылығының қолдауымен медициналық, гигиеналық құралдарды әу баста қолданып, санитарлық сақтық шараларын ерте бастап кеттік. Әлі сол үрдістен жаңылған жоқпыз. Соның арқасында ұжымда шығын жоқ», – дейді станция басшысы. Ал станция басшысының орынбасары Ердәулет Төлеков әріптестерінің денсаулықтарына байыппен қарайтынын мақтанышпен жеткізді. Ұжымда вакцинаны ең алдымен басшылық құрам алған екен. Содан соң, қызметкерлердің екпеге деген сенімдері күшейіп, жалғастырып әкеткен.
«Екпені ғалымдар еріккеннен ойлап тапқан жоқ. Президенттің те, Елбасының да вакцина салдыр- ғанына куә болдық. Демек, ол біздің деніміздің саулығының кепілі деп қарауға тиіспіз. Станция мамандары негізінен ресейлік «Спутник В» екпесі мен араб-қытай елдерінің бірлесе шығарған өнімі – «ХаятВакты» қабылдады. Барлығымыз да бірінші, екінші компоненттерін алдық. Қазір барлығымыздың да денсаулықтарымыз жақсы. Ешқандай шағымымыз жоқ», – деп атап өткен ол қауіпті індет таралғалы ұжымда бір-ақ теміржолшы пневмо- ниямен сырқаттанғанын жеткізді. Ол қазіргі таңда қатарға қосылып, өнімді еңбек етіп жүр.
Ал «Түрксіб» вокзалының бастығы Данияр Райкулов мекеменің көрінетін бірнеше тұсына арнайы плакаттар ілініп, «Ashyq» жобасының QR-коды ілінгенін мәлімдеді. Бұл бойынша қызметкерлерге де түсіндірме жұмыстары жүргізіліп, жолаушыларға қызмет көрсету шаралары жалғасуда. «Коронавирус инфекциясы тарала бастағанда әзірлік жұмыстарын жүргізіп, вокзалды медициналық-санитарлық қондырғылармен, бұйымдармен қамтамасыз еткен болатынбыз. Сол шараны содан бері үзген жоқпыз. Келушілердің дене қызуын өлшеу құрылғылары, қолғаптар, бетперделер, антисептикалық сұйықтықтар үнемі келіп тұрады. Дәрі-дәрмек қобдишаларымыз да дайын», – деді ол.