Бердібек Сапарбаев пен ҚТЖ басшысының орынбасары Тараз вокзалындағы жөндеу жұмыстарын тексерді
Жамбыл облысының әкімі Бердібек Сапарбаев «Қазақстан темір жолы» ҰК» АҚ басқарма төрағасының инфрақұрылым жөніндегі орынбасары міндетін атқарушы Бауыржан Орынбасаровпен бірге Тараз теміржол вокзалының жөндеу жұмысымен танысты. 1986 жылы салынған вокзалға бүгінде жаңғырту жұмыстары жүргізілуде. Мердігері – «Энергетикалық құрылыс» ЖШС. Вокзал түбегейлі өзгеріп, жаңа келбетке ие болуда. Құрылысшылар шатырды, есіктер мен терезе жақтауларын ауыстырып үлгерген. Ғимараттың қасбетін де жаңарту жоспарда бар. Нысанның заманауи дизайны Жамбыл облыстық сәулет және қала құрылысы басқармасымен бірге әзірленіпті. Сондай-ақ жаңа билет кассалары орнатылып, су құбыры, кәріз және жылу жүйелері ауыстырылады. Жолаушылар терминалы, қонақ үй мен асхана орналасқан екінші қабатта да қызу жұмыс жүруде. Мердігерлер жөндеу жұмысы кестеден кешікпейді деп сендірді. Жергілікті сәулетшілер ғимараттың қабырғаларын көркем суреттермен безендіруде. Жолаушылар платформалары, вокзал аумағы да ретке келтірілмек. Айта кету керек, вокзал қалыпты режімде жұмыс істеуде. Мердігер билет кассаларына арналған уақытша ғимарат тұрғызған. Бердібек Сапарбаев вокзал маңындағы барлық нысандардың бірыңғай стилі мен мазмұнға ие болу керектігін атап өтті. Осы орайда, іргедегі тұрғын үйлердің қасбеттері де жаңартылатын болады. Ал Бауыржан Орынбасаровтың айтуынша, жаңғыртылған вокзалдың нобайынан оның тартымдылығын аңғаруға болады. Ол жергілікті әкімдіктің осы жауапты шаруаға мүдделілік танытқанына ризашылығын білдірді. «Біз жергілікті билікпен әркез бірлесіп жұмыс істеуге әзірміз. Барлығымыз да халықтың игілігі үшін қызмет етеміз», – деп ойын білдірді ол Вокзал күтімінің кепілі