Түркістан облысынан батыс өңірге тағы 67 вагон шөп жіберілді
Шымкент қаласы бойынша меншікті тілшісі
Түркістан облысынан еліміздің батыс өңірлеріне тағы да 67 вагон шөп жіберілді. Бұл – батыстағы қуаңшылыққа алаңдаған оңтүстіктің барлық аудан халқының үлесі, деп хабарлайды Rail-news.kz. Қажеттілік болған жағдайда «Қазақстан темір жолы» ҰК» АҚ және Түркістан облысы әкімдігі, демеушілер есебінен қосымша 100 вагон бөлуге келісім бар. Шөп тиелген вагондар өткен апта соңында Сарыағаш қаласының теміржол станциясынан жолға шықты. Биылғы ауа райының қуаңшылығына байланысты мал азығы тапшылығы Түркістан облысында да орын алды. Дегенмен, бүгінгі таңда өңірдегі жағдай тұрақты. Табиғи шөп бітік шықпағанына қарамастан, егістікті әртарап- тандыру орман қорындағы босалқы жайылым жерлер шаруалардың уақытша пайдалануына беру шараларының нәтижесінде облыстағы мал басына қажетті 3,9 млн.тн мал азығын 100% дайындауға толық мүмкіндіктері бар. Десе де, Түркістан облысының тұрғындары, шаруалары, кәсіпкерлер батыстағы ағайынға көмек қолын созуда. Түркістан облысы әкімдігі тарапынан Батыс облыстардың шаруаларына мал азығын жөнелтіп, көмек көрсету жөніндегі еріктілер мен демеушілердің атқарып отырған жұмыстарына жан-жақты қолдау көрсетілуде.