Атырау өңірінде биыл үш бірдей маман «Құрметті теміржолшы» атанды
Атырау облысы бойынша меншікті тілші
Атыраулық теміржолшылар биылғы кәсіби мерекені үлкен еңбек жетістігімен қарсы алды. Атырау жүк тасымалы бөлімшесінің директоры Дархан Құланбаев пен магистральдық желі бөлімшесінің басшысы Елеубай Сапаров әріптестерін мерекемен құттықтап, озаттар мерейін үстем етті. Биылғы жылы өңірден үш бірдей адам «Құрметті теміржолшы» атанды. Олар: Атырау жүк тасымалы бөлімшесінің бірінші орынбасары Самат Құлмұханов, Атырау локомотив пайдалану депосының тепловоз машинисі Төребек Оспанов және Атырау вокзалының бастығы Айгүл Кулшикова. Айта кетерлігі, С.Құлмахановқа «Құрметті теміржолшы» белгісі, Құлсары жол дистанциясының жол жөндеушісі Ш.Қайшыбаевқа «Алғыс хат» ҚР Индустрия және инфрақұрылымды дамыту министрінің міндетін атқарушы Қ.Өскенбаев бейнеконференция арқылы өткен мерекелік жиын барысында табыстады. Сонымен қатар, Атырау локомотив пайдалану депосының машинисі Б.Саткулов «Адал еңбегі үшін» төсбелгісімен, Атырау жол дистанциясының жол шебері А.Жылқыбаев «Кәсібі бойынша үздік» атанса, Атырау магистральдық желі бөлімшесінің вокзал шаруашылығы бөлімі инженері М.Ізмұқанов «Үздік маман» төсбелгісімен, сондай-ақ көптеген мамандар «ҚТЖ» ҰК» АҚ Басқарма төрағасының Құрмет грамотасы, Алғыс хатымен, Атырау жүк тасымалы бөлімшесі басшысының Алғыс хатымен марапатталды. Елдегі пандемия жағдайына байланысты адамдар көп жиналған жоқ, одан басқа да өңірде жұмыс жасап жатқан теміржолшыларға марапаттары өз еңбек ұжымдарында табысталды. Атырау магистральдық желі бөлімшесі салалық жарыста 1-ші орынға ие болып, 1-дәрежелі дипломмен марапатталса, бөлімше директоры Е.Сапаровқа «Үздік басшы» төсбелгісі табыс етілді. Мекеменің озық қызметкерлеріне «Үздік маман», «Кәсібі бойынша үздік» төсбелгілерімен марапатталды.