Маңғыстаулық өртке қарсы қызмет жасағы барлық нысандардағы ереже бұзушылықтарды анықтады
Маңғыстау облысы бойынша меншікті тілші
Маңғыстау өртке қарсы қызмет жасағы соңғы бес жылда салалық жарыста үздік үштіктің қатарынан түскен емес. Былтырғы жыл қорытындысы бойынша тағы да бірінші орыннан көрінген үздік ұжым кәсіби мерекеде «Салалық жарыс- тың I дәрежелі» дипломын иеленді. Ұжымды осындай жетістікке жетелеген оның басшысы Қайырхан Таласов «Үздік басшы» атанды. Үш өрт сөндіруші Маңғыстау магистральдық желі бөлімшесінің Алғыс хатымен марапатталды. Олар: жасақтың Болашақ, Маңғыстау, Бейнеу өрт сөндіру пойыздарынан өрт шеңберін жөндеу шебері Нұрсұлтан Елубай, аға өрт сөндіруші Серік Шалабаев, қарауыл бастығы Бақытжан Дәулетбаев. Бүгінде бұл мекемеде жалпы 43 адам еңбек етеді. Оның ішінде жасақ әкімшілігінде 6 адам, Бейнеу өрт сөндіру пойызында 17 адам, Болашақ пен Маңғыстау өрт сөндіру пойыздарында 10 адамнан. – Былтырғы жеті айда түбек теміржолы ау- мағында өрт кездеспеді. Биыл біреуі тіркелді. Наурызда Бейнеу-Сай-Өтес телімінде №3316 жүк пойызының құрамындағы 2ТЭ10М-№2882 локомотивінің «А» секциясында өрт шықты. Сондай жағдайлардың алдын алу үшін жоспарға сәйкес жұмыстар жүргізілуде. Осы жеті ай көлемінде жалпы саны 224 нысанның өрт қауіпсіздік жағдайы тексеріліп, 152 түрлі дәрежедегі бұзушылық анықталды. Олар негізінен темір жол жиегінің қуарған шөп-шаламнан тазаланбауы, автоматты өрт дабыл қаққыштың жарамсыздығы немесе жабдықталмағандығы сынды кемшіліктер болды. Тақтай сөрелерінің асбест қоспасымен қанықтырылмауы, тоқ сымдарының ақауы, тоқ сымдарының кедергі күшінің тексерілмеуі, өртке қарсы сумен жабдықталмауы, тағы да басқа бұзушылықтар кездесті. 8 нысанға және 2 тоқ жүйесі нүктесіне өрт қауіптілігі жайында ескерту парағы берілді. Сонымен қатар 72/513 жолаушылар пойыздары/вагондары тексеріліп, олардан 198 бұзушылық табылды. 5 вагон өрт қауіптілігі жайында ескерту парағын алды. 1173 локомотивтен 534 бұзушылық, 42 арнайы жылжымалы құрамнан 2 кемшілік кездесті, – деп ақпарат берген «ҚТЖ» ҰК» АҚ мемлекеттік емес өртке қарсы қызметінің Маңғыстаудағы бастығы Қайырхан Таласовтың айтуынша, өртке қарсы қызмет аталған мерзім ішінде 8 оқу-жаттығу, 5749 жұмыскерге өрт қауіпсіздігі нұсқауын өткізген.