Қызылордада машинистер 7 айда 59 рет пойызды шұғыл тоқтатуға мәжбүр болды
Қызылорда облысы бойынша меншікті тілші
Қызылорда жол дистанциясы бөлімшенің Түркістан мен Жосалы станциясы арасындағы телімдерде пойыздардың қозғалыс қауіпсіздігіне жауап береді. Жыл басынан бері дистанция теміржолшылары тарапынан қозғалыстың бұзылуына жол берілмей, қандай да бір апаттық жағдайлар, оқыс оқиғалар орын алмаған. Дегенмен, қауіпсіздікке төрт түліктен, одан қалды бейсауыт жүрген адамдардан төнетін қауіп сейілмей тұр. Жыл басынан бергі жеті айда пойыз машинистері 59 мәрте жедел тежегіш қолданса, шілде айының өзінде 8 рет оқыс тоқтауға мәжбүр болған. Қызылорда жол дистанциясының 2-өндірістік телім басшысының орынбасары Рүстем Досымовтың мәлімдеуінше, жылжымалы құрам машинистерінің жедел тежегіш қолдануына мәжбүрлеген 59 жағдайдың тең жартысына жол үстіне шығып кеткен иесіз мал себеп болса, жартысы бөгде адамдардың кесірінен болып, пойыздар кестеден кешіккен. Оқиғалардың басым бөлігі дистанцияның 1 және 2 телімдерінде, яғни тұрғындар тығыз қоныстанған аумақтарында орын алған.
– Осындай келеңсіз жағдайлардың алдын алу үшін теміржолдың қауіп-қатері жайлы халыққа түсіндірудей-ақ түсіндіріп келеміз, жол бойына сым қоршаулармен бөгет жасау жұмыстары да тұрақты жүргізілуде. Дегенмен, аталған кедергілер сейілер емес. Әсіресе 2725-2781- 2826-3030 шақырымдарда, тұрғындар жиі қоныстанған елдімекендерде пойыздар қозғалысына төнетін қауіп көп. Жол бойындағы халықты аралап, жолға жақын мал жаю, теміржолды белгіленген жерлерден ғана кесіп өту ережелерімен таныстырып, ҚР кодексінің 439-бабына сәйкес кінәлілер әкімшілік жауапқа тартылатындығын ескерткенмен нәтиже болмай тұр, – дейді Рүстем Досымов.
Дистанция басшылығы оқыс оқиғалар жиі орын алатын Шиелі станциясы маңына, Қызылорда қаласының Шұғы- ла-КБИ, Белкөл және ЦКЗ шағын аудандары тұсындағы қауіпті саналатын орындарға теміржол өткелін, көпір салу қажеттігін және ЖІІб инспекторларының тұрақты бақылауға алып кезекшілік ұйымдастыруын ұсынып тиісті орындарға бірнеше мәрте ресми хат жолдаған, алайда олардан да еш әрекет болмай тұрған сыңайлы.