Жамбыл вагон пайдалану депосының мамандары соңғы кезде бақылауды күшейтті

Жамбыл вагон пайдалану депосының басшылары мен командалық-инструкторлық құрамы технологиялық процесс талаптарының сақталуын жоспарға сай тексеріп отырады. Депо басшысы Талғат Жасұзақовтың айтуынша, кепілдік учаскелерде пойыздардың вагондарды ағытпай өтуі бойынша барлық қажетті шаралар қабылданады. Жылжымалы құрамға техникалық қызмет көрсету пункттерінің вагондарды дайындау сапасына бақылауды күшейту бағытындағы шаралар да үнемі жетілдіріліп отырады.

«Деподағы күрделі жөндеу жұмыстары, технологиялық процестер, нұсқаулықтар және басқа да нормативтік құжаттар негізіндегі жұмыстар, олардағы талаптардың орындалуы назардан түскен емес. Вагон қабылдаушылардың бақылауын қамтамасыз ете отырып, жоспарлы жөндеу түрлерінен вагондарды қабылдау сапасын арттыруға мән береміз. Негізгі техникалық қызмет көрсету пунктінің мамандары да пойыздарды өңдеу сапасын жақсарту бойынша тұрақты бақылау жүргізеді», – деп атап өтті Талғат Советұлы.

Депо басшылары мен командалық-инструкторлық құрам әрбір тексерудің нәтижелері бойынша анықталған өзгерістердің туындау себептеріне егжей-тегжейлі талдау жасайды. Анықталған ескертулерді жою және қайталауға жол бермеу жөніндегі іс-шаралар жоспары жасақталады. «Аталған жоспардың аясында пойыздар қозғалысының қауіпсіздігін қамтамасыз етуге және жүк вагондарының құйылған бөлшектерінің сыну жағдайларын болдырмауға бағытталған шаралар қабылдау мақсатында «Бүйір жақтауын бақылаудың» төрт айлығы өтті. Сонымен қатар телеграфтық нұсқау негізінде ақаулы доңғалақ жұптарының, арбалардың құйылған бөлшектерінің, тежегіш жабдықтарының және автотіркегіш құрылғыларының ақаулары қаупін төмендету үшін «Жоғары қырағылық» айлығын өткіздік. «ҚТЖ-Жүк тасымалы» ЖШС басшылығының тапсырмасымен «Кәсіби білікті арттыру» айлығын жарияладық», – дейді Талғат Жасұзақов. Маманның айтуынша, теміржол тасымалында тұтқалары, баспалдақ сатылары, алаңдарының ақаулары бар жүк вагондары пайдаланылып жатады. Ал бұл теміржолшының өндірістік жарақаттар алуына себеп болады. Сондықтан осындай олқылықтардың алдын алу мақсатында «Вагонның (тұтқалар, сатылар, алаңдар) технологиялық тұрақтылығының тиімділігі» атты еңбекті қорғау айлығы ұйымдастырылған. Мұнымен қоса, тұрмыстық-техникалық қалдықтарды тасымалдауды қабылдау кезінде тиеуді сапалы қарау бағытында арнайы шаралар өткен.

«Мамыр айында Шу, Тараз, Түрксіб станцияларында сұрыптау нүктелерінде вагондарды тарату технологиясын сақтау бойынша іс-шаралар легін өткіздік. Бұлардың әрқайсысы бойынша тиісті жұмыстар жүргізіліп, есептер ұсынылды», – деген депо басшысы бұл шаралар саладағы жұмыстарды ширатқанын мәлімдеді.