Жамбыл облысында өтетін орын мен қоршаудың жоқтығынан 3 жасар қызды пойыз басты
Жамбыл облысы аумағындағы Құмшағал станциясында қайғылы оқиға орын алды. Әйел адам баласымен бірге тоқтап тұрған жүк пойызының астынан өтпек болып, сол сәтте орнынан қозғалып кеткен вагон үш жасар қызды басып кеткен. Бұл алақандай ауылда биылдыққа тіркеліп отырған бесінші жағдай екен. Жергілікті тұрғындар осы оқиғадан соң құзырлы органдар бір амал жасауы қажет деп са- найды. Өйткені, мұндай төтенше жағдай соңғы уақытта тіпті жиілеп кеткен. «Теміржол бойындағы салғырттықтың салдарынан неше адам ажал құшып, мүгедек болып қалып жатыр. Не деген сұмдық бұл?! Тиісті мекемелер бір шара қолданып, тоқтатудың амалы бар ма?», – дейді Құмшағал ауылының тұрғыны Тәттібек Құрманәлі. Аталған оқиғаға орай полиция қызметкерінің де айтары бар. Өйткені, балаларын қараусыз, қадағалаусыз, еркінен тыс жіберетін ата-аналар көп. Мұның арты көп отбасын опындырып жатады.
«Бұл жағдайға қатысты сот алдындағы тергеу амалдары басталып кетті. Жол қозғалысы кодексінің 344-бабының 2-бөлігінде теміржол көлігінде қозғалыс қауіпсіздігі ережелерін бұзу шаралары қаралған. Кінәлілер болса, тергеу кезінде анықталады», – деді Көліктегі полиция департаменті әкімшілік полиция бөлімінің басшысы Мақсат Дүйсенбиев.
Ал қоғам белсендісі Орынбасар Тоқбергенов теміржол бойында орын алатын мұндай оқыс оқиғаның басым бөлігі адамдардың ажал құшуымен аяқталатынын айтады. «Тұрғындардың тәуекелін тоқтатудың бір амалы мұнда жол өткелін салып, пойыз жолының маңын қоршау қажет. Алайда, біз осы ұсынысымызды басшыларға бір емес, бірнеше мәрте жеткіздік. Әзірге ешқандай шаруаның қолға алынбағанын, тіпті нәтижесін де көріп отырмыз. Теміржол аймағынан өту үшін белгіленген орын немесе қоршау болуы керек. Біздің талабымыз да, ұсынысымыз да осы», – дейді ол. Осыған дейін өңірдегі көліктегі полиция қызметкерлері жүріп бара жатқан пойыз бен платформа арасындағы саңылауға түсіп кеткен ер адамды құтқарып қалған болатын. Бұл оқиға 23 шілде күні Тұрар Рысқұлов ауданында орналасқан Түрксіб бекетінде болған. Ер адам «Көкшетау-Қызылорда» бағытындағы пойызға кешігіп қалып, жылжып бара жатқан вагонның есігіне жармасқан. Ол полиция қызметкерлерінің ескерту ысқырығына да жауап бермеген. Салдарында жолаушының аяғы тайып, пойыз бен платформа арасындағы саңылауға түсіп кеткен. Пойыз шұғыл тежегішті басып, тәртіп сақшылары зардап шегушіні пойыз астынан шығарып алған. Кейін анықталғандай, медициналық сараптама 31 жастағы Қызылорда қаласы тұрғынының орташа дәрежедегі мас күйінде болғанын көрсеткен. Ер адамға Әкімшілік құқықбұзушылық туралы кодекстің 440-бабының 1-бөлігі – алкогольдік ішімдік ішу немесе мас күйінде қоғамдық орындарда болу және 560-бабы – теміржол көлігі құралдарын пайдалану ережелерін бұзу бойынша екі хаттама толтырылған. Соған сәйкес, жолаушыға 10 айлық есептік көрсеткіш (29 170 теңге) көлемінде айыппұл салынды. Ал ведомство осы оқиғаға бай- ланысты жоғарыда аталған пойыз жоспардан тыс тоқтап, кешігу уақыты 3 минутты құрағанын мәлімдеді.