ПЧ-40 жол дистанциясының жолшылары екі шақырымдық қоршау орнатты
Абай облысы бойынша меншікті тілші
Жаңа-Семей жол дистанциясында желі бойындағы жазғы жұмыстар қызу жүріп жатыр. Жыл басында құрылған жоспар аясында Семей мен Шар станциялары аралығындағы телімдер бойынша малдан қорғайтын қоршаулар тұрғызу биыл да жалғасуда. ПЧ-40 жол дистанциясының жолшылары қазіргі күнге дейін №1 жол айрығы мен Шөптіқақ станциясы аралығындағы 2 км желі бойына қоршау салып шығыпты. Меже бойынша алдағы қазан айына тағы 4 шақырымдай телім бойы толық қоршалмақ. Яғни, №4 жол айрығы мен Суықбұлақ, Делбегетей және №12 жол айрығы мен Қапанбұлақ станциялары аралығында жұмыс жүргізілетін болады.
– Бұл аумақтардың барлығы да жақын орналасқан шаруа қожалықтарының малы ауа жайылатын қауіпті жерлер. Жолға жиі шығып кететін ірі қарадан қорғанудың бірден-бір жолы әзірге осы қоршау тұрғызу болып тұр, – дейді бұл орайда Жаңа-Семей жол дистанциясының техникалық бөлімінің мамандары.
Өткен жылы 4,6 шақырым желі бойына жаңадан қоршаулар тұрғызылған еді. Яғни, жыл сайын ең кемі 4 немесе 5-6 шақырымдай қорғандар салынады екен. Жалпы саны, желінің қос қапталын алғанда, 60 шақырым аумақ толық қоршалған. Осылайша жыл өткен сайын желі бойындағы төрт түліктен төнер қауіп сейіліп келеді. Сәйкесінше, шұғыл тежелу оқиғалары да азайғаны байқалады. Биылғы жылы карантиндік шектеулер бойынша жергілікті мал бағатын шаруалармен кездесулер өткізуде кедергілер болып тұр. Әйтсе де, жуырда желіге жақын орналасқан Приречный ауылдық округінің малшы қауымымен жиын өткізіліп, ескертулер жасалыпты. Бұл шаралардың сыртында Шар, Жаңғызтөбе станцияларынан желілік полиция бөлімі қызметкерлері де айыппұл салып, хаттама толтырып, жұмыс- тар жүргізуде. Орган өкілдері жолшылармен тығыз байланысты. – Жазғы жол жөндеу жұмыстарымен бірге желі бойындағы қозғалыс қауіпсіздігін сақтау мақсатында да белгіленген жоспар аясында нақты іс-шаралар жүргізілуде. Соңғы жылдары кеңінен күш салынып жатыр. Соның нәтижесінде дистанция бойынша кемшіліктер мен тосын оқиғалар саны да азаюда, – дейді ПЧ-40 мекемесінің техникалық бөлімінің басшысы Ғафур Рахымбаев.