Маңғыстауда кірме жолдар қауіпсіздігі пысықталды
«Қазақстан теміржолшысы» газетінің тілшісі
Теміржолда жылжымалы құрамның жолдан шығып кетуі, соғысуы секілді оқиғалар көбіне кірме жолдарда орын алып жатады. Сондықтан кірме жолдар, ондағы қозғалыс қауіпсіздігі назардан тыс қалмауы тиіс, деп хабарлайды Rail-news.kz. Маңғыстау бөлімшесінің Өзен станциясында ревизорлар, кірме жолдардың иелерінің қатысуымен кеңейтілген кеңес өтті. Онда "Өзенмұнайгаз" АҚ, "УПТОК", "КазРосимпекс", "Әлия", "Ақжол" ЖШС иелеріне кірме жолдарда орын алатын апатты жағдайлардың себептері мен жағдайы туралы ақпараттар берілді.
– Биыл өткен 7 айдың жұмыс қорытындысына келсек, жалпы Қазақстан теміржолы бойынша келеңсіз жағдайлардың көбі кірме жолдарда маневрлік жұмыстар кезінде ережелердің бұзылуы, яғни вагондардың өз беттерінше қозғалысқа түсуі, жылжымалы құрамды тіреуіш табандармен дұрыс бекітпеу және жолдың жоғары төсемінің техникалық жағдайының, яғни бағыттама бұрмалары, шпал мен рельстің сапасыздығынан болған. Бірақ мұндай оқиғалар Маңғыстау өңірінде болған жоқ, дегенмен алдын алу шарасы ретінде осындай кеңестерді жоспарға сай өткізіп отырамыз, – дейді Маңғыстау ЖТ қосалқы бөлімшесі директорының орынбасары Ерлан Бүркітов.
Осындай оқиғалардың біреуін талқылау кезінде «УПТОК» кірме жолының жетекшісі М.Өтесінов «әрбір осындай тармақ иелері темір жол нұсқаулығы талаптарына сай жұмыс істеуі керек» деп пікірін білдірді. Расында теміржол аса қауіпті аймақ екенін ескерсек, әрі қандай жағдайда да Қазақстан теміржолының атына нұқсан келетіндіктен, кірме жолдар иелері теміржолдағы қауіпсіздік талаптарын қатаң сақтауы тиіс. Аталған жиын соңында кірме жолдардағы жұмыстар кезінде жіберілетін кемшіліктерді жою шаралары қабылданды.