Семей станциясында алты ай ішінде теміржолда жасалған 29 қылмыстық іс тіркелген
Абай облысы бойынша меншікті тілші
Семей ЖТ бөлімшесі бойынша желі бойындағы қауіпсіздік шаралары қатаңдатылуда. Мәлім болғандай, соңғы айларда тұрғындар тарапынан қауіпсіздік ережелерін бұзу фактілері мен теміржол бөліктері мен құрылғыларын жымқыру жиілеген. Сондықтан, желі бойындағы жазатайым оқиғалардың алдын алып қана қоймай, түрлі құқық бұзушылықтардың жолын кесу мақсат болып отыр. Бұл ретте жергілікті жолшылар арнайы жүргізілген акция аясында тұрғындарға, соның ішінде автокөлік тізгіндегендерге теміржол өтпесіндегі қауіпсіздік бойынша жадынама парақшалар таратып шыққан болатын. Ал, Семей станциясы бойынша желілік полиция бөлімшесінің пікіріне сүйенсек, соңғы алты ай ішінде теміржол бойында орын алған 29 қылмыстық іс тіркеліпті. Мәселен, жуырда Дегелең станциясында үш адамнан біріккен топ теміржолдың бөліктері тиелген вагоннан ұрлық жасап ұсталды. Қозғалынған қылмыстық іс бойынша келтірілген шығын көлемі 68 мың 590 теңгені құраған. Сонымен қатар, қала тұрғындары да теміржолдың реттелмеген жерінен өтіп, қауіпсіздік ережелерін өрескел бұзудан тыйылар емес. Соның салдарынан жазатайым оқиғалар да орын алуда. Қайғылы жайттардың алдын алу мақсатында профилактикалық іс-шаралар жиі жүргізілуде. Бұл орайда бөлімшеге қарасты 724 шақырымдық желі бойындағы жеті полиция пунктінде біршама қатаң шаралар қолға алынған. Тексеру, із кесу жұмыстарына да мән берілуде. Соның нәтижесінде пойыздарда есірткілік заттарды заңсыз сақтаудың 4 фактісі тіркелген. Ал, әкімшілік-құқықбұзушылық жасағаны үшін 949 адам ұсталып, оның ішінде 99 адамға әкімшілік айыппұл салынған. Қазіргі күні теміржол бойындағы қауіпсіздік шараларын нығайту, тұрғындар өмірін сақтап, жолаушылар мен теміржолшылар құқықтарын сақтау бойынша қолға алынған шаралар қатарына желілік полиция қызметкерлерінің халықпен әлеуметтік желі арқылы байланыс жасауы да кіреді. Мәселен, тұрақты жүргізілетін мониторинг барысында тұрғындар пікірі мен өтініштері ескеріліп, арыз-шағымдары да тіркеледі екен. Бұл жайт, сөз жоқ, еліміздегі теміржол қызметінің сапасына да оң ықпал ететіні анық.