Жамбылдағы жарылыстан зақым келген жолдар қалпына келтірілді
Жамбыл облысының Байзақ ауданындағы әскери бөлімшеде өткен аптада алапат өрт шығып, соңы жойқын жарылысқа ұласқаны белгілі. Елімізді дүр сілкіндірген төтенше оқиғаның салдарынан 15 адамның қаза тапқаны туралы мәлімет тарады, 100-ге жуық азамат зардап шекті. 150-ге тарта жеке тұрғын үйлер мен әлеуметтік, кәсіпкерлік нысандар бүлінген. Қазіргі таңда ахуал тұрақталып, бүлінген ғимараттар қалпына келтірілуде. Зардап шеккен ны- сандардың қатарында әскери бөлімнен 300 метр қашықтықта жатқан теміржол да бар. Жарылыс кезінде пайда болған толқыннан және бетондардың ұшуынан Тараз-Луговое учаскесінің жұп және тақ жолдарына біршама зақым келген. Жарылыс орын алған уақыттан бастап ол жолдан өтетін жолаушылар мен жүк пойыздары тоқтатылған болатын. Өрт шыққан жерден 8-10 шақырым жерде орналасқан Үшбұлақ станциясына Тараз қаласынан өрт сөндіру пойызы келген. Сондай-ақ, Шу станциясынан өрт сөндіру пойызы жіберілген. Жамбыл жүк тасымалы бөлімшесінің директоры Үмітбек Рысбековтің сөзінше, 26 тамыз күні кеш бата орын алған он шақты жарылыстың салдарынан әскери бөлімнің тұсындағы теміржол біршама зақымданған. «Төтенше оқиға кезінде жолға бетондар түсіп, 4 шпалды ауыстыруға тура келді. Жарылыс толқынының салдарынан рельстердің байланыстары үзіліп, жол жарамсыз болып қалға н еді. Біздің теміржолшылар ақау орын алған тұсқа 27 тамыз күні таңғы 8.00 шамасында жетіп, 11.10-да теміржолды толық жөндеп бітті. Іле-шала екі жолға да электр энергиясын беріп, облыстық штабқа теміржолдың барлық инфрақұрылымы дайын екендігін мәлімдедік», – деді Үмітбек Есмұратұлы. Өңірдегі бас теміржолшының сөзіне қарағанда, төтенше оқиғадан соң көп ұзамай шойын жолдың бойында саперлер жұмыс істеген. Олар қауіп туғызуы мүм- кін аумақты тазартып, арнайы құрылғылармен жіті тексерген. Одан кейін теміржолшылардың өздері де мұқият бақылаған.
«Жол жөндеу жұмыстарына жолшылар мен байланыс желісі қызметкерлері, электр қуатымен қамту мекемесінің маманда- рынан жасақталған 35 адам жұмылдырылды. Ал тоқтатылған пойыздардағы жолаушыларды 20 шақты автобус қажетті межеге күні-түні тасымалдады. Жалпы 10 мыңға жуық жолаушыны тиісті станцияларына жеткіздік», – деді Ү.Рысбеков.
Жамбыл жүк тасымалы бөлім- шесі басшысының орынбасары Дүйсен Сыдықовтың сөзінше, төтенше ахуалға байланысты жүк пойыздарымен бірге, 8 жолаушылар пойызы тоқтатылған. Олардың ішінде 11 мыңға тарта жолаушы болған.
«Біздің автобустарымыз Шымкент жақтан, Тараз станциясынан тоқтатылған пойыздардың жолаушыларын Ақшолақ станциясына, Түрксіб, Шу станцияларынан тоқтатылған пойыздардың жолаушыларын Шымкент жаққа тасымалдады. Оларды баратын бағыттарына қарай пойыздардың уақыттарымен үйлестіру жұмыстары да қолға алынған. Ал жолаушылар сол билеттерімен сапарларын жалғастыра береді», – деді Д.Сыдықов.
Ал жолаушылар тоқтатылған пойыздарға жол жүру құжаттарын қайтару бойынша жүгінгенде билеттерінің ақшасы қайтарылды. Алайда, пойыздардың кешіккені үшін айыппұл төленген жоқ. Дүйсен Сыдықов облыстық штаб пен Жамбыл жүк тасымалы бөлімшесі басшылығының бірлескен шешімімен 27 тамыз күні кешкі сағат 19.00 шамасында жолаушылар пойыздарының қозғалысы басталғанын жеткізді. Бүгінде пойыздар қозғалысы қалыпты, еш кедергі жоқ.