Атырау ЖТ бөлімшесінде күзгі тексеріс қорытындысы бойынша 1161 кемшілік анықталған
Атырау облысы бойынша меншікті тілші
Күзгі комиссиялық бақылауды қорытындылау жиынында қауіпсіздік техникасы мен еңбек қорғау, қозғалыс қауіпсіздігін қамтамасыз ету және қызметтік-техникалық ғимараттардың жағдайы бойынша барлық шаруашылықтардағы кемшіліктер сараланды. Тексеру комиссиясының төрағасы, Атырау жүк тасымалы бөлімшесінің директоры Д.Құланбаев, тексеру барысында станциялардың техникалық жағдайы, жолдың үстіңгі қабаты, магистральдық инфрақұрылым мен жасанды құрылыстардың жағдайы, су мен жылу нысандары, өрт қауіпсіздігін сақтау ережелері, орталықтың бұйрықтары мен басқа да нұсқаулықтарын орындау тәртібі қаралғанын айтты. Өткен сегіз айда Атырау жол бөлімшесі бойынша пойыздық және маневрлік жұмыстарда ақау, өндірістік жарақат алу жағдайы болмаған. Жалпы алғанда, қозғалыс қауіпсіздігі, еңбек қорғау және қауіпсіздік техникасы, техникалық құралдардың жағдайы, ғимараттардың абаттандырылуы, жұмысшылардың тәртібі – қанағаттанарлық. Тексеріс кезінде бөлімше бойынша барлығы 1161 кемшілік анықталған. Соның ішінде ең көбі жол шаруашылығына қатысты болды, яғни жолдардың сапасына сын көп. Мақат, Атырау, Ганюшкино станцияларында біраз жолдарда шпалдар ескірген, бағыттамалы бұрмалардың бекітпелері осал, дұрыс жұмыс жасамай қалады. Сағатына 15 км жылдамдықпен жүретін телімдер де кездеседі. Жөндеуден шыққан материалдар сол жерде шашылып қалған, оны уақытылы жинастырып, қоймаға өткізу қажеттігі ескертілді. Сигнализация және байланыс дистанциялары бойынша электр желілерін, бағыттамалы бұрмаларды сыртқы тексеру, рельс тізбектерін оқшаулау элементтерін жөндеу бағытында да кемшіліктер бар. Кей станцияларда дауыс күшейткіш дұрыс жасамайды. Дистанцияларда техникалық құжаттама жүргізуде олқылықтар орын алған, бұл – мамандардың білімін жетілдіру қажет деген сөз. Электрмен жабдықтау дистанцияларында жарықтандыруды және техникалық сабақтар сапасын жақсарта түсу қажет. Атырау вагон пайдалану депосының командалық-нұсқаулық құрамы тарапынан лауазымдық міндеттері сапасыз орындалады. Мұның нәтижесі вагон қараушылардың жауапкершілігінің төмендеуіне, вагонға техникалық қызмет көрсетуде ақауды анықтау мен түзетудің дұрыс орындалмауына әкеледі. Сондықтан өндірістік-техникалық қызмет көрсетудің сапасын арттырып, вагонқараушылардың жұмысына бақылау жүргізу қажет. Қосалқы бөлшектер, Ганюшкино станциясында қол шамдары жеткіліксіз. Атырау, Мақат локомотив деполары мен Мақат сервистік орталығында локомотивті жөндеу, күтіп-ұстауға, локомотивті қабылдау кезінде тексеріп, ақаулардың жоқтығына көз жеткізуге көп көңіл бөлу керектігі айтылды. Сервистік орталықта жағдай біраз түзелген, жөндеу құралдары жаңасына алмастырылып, қажетті саймандар алынған, бірақ әлі де болса кейбір қосалқы бөлшектердің жетіспеушілігі бар. Локомотив шаруашылығы бойынша машинист-нұсқаушыларға сын айтылды. Олардың тарапынан пойыздың жүруі, автотежегішті басқару, машиниске қатысты басқа да кемшіліктер анықталмайды. Локомотив бригадаларының бақылау-нұсқау сапарлары, пойыз машинистерімен радиобайланыс дұрыс ұйымдастырылмайды. Жиын соңында күзгі байқау қорытындысы саралана келе, бөлімше басшылығымен аталған кемшіліктерді түзету, көктемгі тексеріс анықтаған олқылықтарды қалпына келтіру, өз міндеттеріне жауапты қарау және әр он күн сайын кемшіліктердің қалай түзетіліп жатқаны туралы есеп беріп отыруға шешім қабылданды.