Жамбыл магистральдық желі бөлімшесі қысқы маусымға дайын
Жамбыл магистральдық желі бөлімшесі қысқы маусымға дайындық барысында анықталған проблемаларды жүк тасымалы бөлімшесімен бірлесіп шешіп, бүгінде тастүйін дайын отыр. Бөлімше директоры Сұлтан Боранбаев алдағы алты айлық мезгілге, әсіресе Бурыл, Тараз, Шақпақ, Жаңатас, Үшбұлақ, Қордай, Бірлік-1, Мыңарал, Жастар станциялары тыңғылықты дайындықпен келгенін атап өтті. Сол себепті ол мекемелердің басшыларына Құрмет грамоталары тапсырылып, бастауыш кәсіподақ ұйымының қаражаты есебінен бағалы сыйлықтар тарту етілген.
«Жамбыл магистральдық желі бөлімшесі бойынша шаруашылық пен кадрларды даярлау іс-шаралары толығымен орындалуда. Өңірдегі жүк тасымалы бөлімшесімен бірлесіп қар күреу жұмыстарының жоспары да әзірленді. Ең алдымен қабылдау-жөнелту және сұрыптау жолдары тазаланатын болады. Қар тазалайтын және жинайтын техникалардың орналасатын станциялары да анықталды. Қызметкерлердің штаты жасақталған. Жұмыс орындарды қажетті керек-жарақтармен мұқият жабдықталған, сигналдық құрылғылармен де қамтамасыз етілген. Қазіргі жағдайда шаруашылық пен кадрларды даярлау 68,4 пайызды құрайды», – дейді Сұлтан Адамбайұлы.
Оның айуынша, биыл 3 шақырымға жуық қардан қорғайтын қоршаулар ағымдағы жөндеуден өткен, сондай-ақ, 400 дана қар қалқандары сатып алыныпты. Сонымен қатар 1,7 шақырымдай жол бойындағы қар қалқандарына ағымдағы жөндеу жұмыстары жүргізілген. Аймақтағы 60 станцияның барлығының жолдары, оның айналасы қоқыс, шөптен тазартылыпты. Ағымдағы жылы қысқы маусымға қажетті тұрмыстық көмір көлемі 2708 тоннаны құрап отыр, әзірге қатты отын жеткізілмепті. Ал әкелінуі тиіс 1 876 тонна техникалық көмірдің 1000 тоннадан астамы келіпті. Оңтүстікте ауа-райының жылы болуына байланысты, бұл өңірге көмір кешеуілдетіп жеткізілетін және бұл бағыттағы жұмыстар жақын арада толық орындалатынын айтады мамандар. Қызметтік-техникалық ғимараттардың дайындығына келсек, жоспарға сәйкес осы қысқа 168 нысан мен үй-жай әзірленген. Магистральдық желі мекемелерінде 10 қазандық бар, оның ішінде 7-еуі қатты отынмен жылытылса, 2 қазандық дизель отынымен жұмыс істейді. Ал 1-еуі электр қуатымен жылытылады екен. Барлығы да арнайы тексерулерден өткізіліп, техникалық жағдайлары қалыпты екеніне көз жеткізілген. Қазір бөлімше мамандары қысқы техникалардың жай-күйіне аса көңіл бөліп, оларды тексеруде. Мәселен, 1 қар жинайтын техника деполық жөндеуден өтсе, 10 техника қазір тексеруге алынған.
«Қыс жағдайында жұмыс істеуге жұмылдырылатын 93 автокөліктің қазір іс жүзінде 87-сі дайын. Қалғандары жөндеу жұмыстарынан өтіп жатыр. Дизель отынымен қамтамасыз ету жұмыстары толық жүзеге асқан жоқ. Келісімшарт бойынша 1 қарашаға дейін жеткізілуі тиіс. Кадрларды дайындау да күн тәртібінде. Бүгінге дейін 157 теміржолшы арнайы тағылымдамадан өтіп, жұмысқа жіберілді. Қысқы арнайы киіммен қамтамасыз ету жоспары 96 пайызға орындалды», – дейді бөлімше директоры С.Боранбаев.