Болашақ станциясында шағын футболдан жарыс өтті
Маңғыстау облысы бойынша меншікті тілші
Қазақстан теміржолшылары кәсіподағының отыз жылдығына орай Болашақ станциясында шағын футболдан жарыс өтті. Спорттық сайысты Маңғыстау белгі беру және байланыс дистанциясының кәсіподақ ұйымы ұйымдастырды.
Сайысқа осы өңірде белгі беру және байланыс саласында еңбек етіп жүрген теміржолшылардан құралған алты команда қатысты. Болашақ, Сай-Өтес, Қарақия станцияларындағы дистанция бөлімдерінен бір-бір команда және Маңғыстау дистанциясының әр ауданынан үш топ құрылды.
– Ойын тамаша өтті. Тек бір саланың жігіттері, яғни тек байланысшылардан құралған командалар ойыны қызық болады екен. Ұйымдастыру деңгейі де жоғары болды. Бірінші орынды Маңғыстау станциясының радио-цех жігіттері, екінші орынды Сай-Өтес командасы, үшінші орынды Болашақ станциясының мамандары иемденді. Жеңімпаздарға ойын кубогы, диплом мен қаржылай сыйлық табысталды. Бас жүлдеге 30 мың, екінші орынға 20 мың, үшінші орынға 10 мың теңге берілді. Салалық кәсіподақ ұйымының мерейтойына арналған спорттық жарыстар алдағы уақытта тағы да жалғасады, – дейді Маңғыстау теміржолының спорт нұсқаушысы Нұрайна Қыдырова.