Машат лагеріне екінші топ аттанды
Қызылорда облысы бойынша меншікті тілші
Ұлттық компания үшін теміржолшылардың балалары жазғы демалысын тиімді өткізуі маңызды. Биыл кәсіподақ ұйымдарының басшылығымен балалар жазғы лагерьлерде демалуда.
Қызылордада осыған дейін балалардың алғашқы легін Машат лагеріне апарып келген кәсіподақ өкілдері келесі топпен тағы да 50 баланы лагерьге алып кетті.
– Өткен жолы магистральдық желі бөлімшесіне қарасты мекемелерде еңбек ететін теміржолшылардың балалары барған болатын. Бұл жолы Жүк тасымалына қарасты Сексеуіл мен Түркістан станциялары арасындағы бекеттерде жұмыс жасайтын теміржолшылардың бүлдіршіндеріне жолдама берілді. Барлығы 50 бала, оларды сауықтыру орнына апаруға жауапты кәсіподақ ұйымының 5 қызметкері мен 1 медбике бөлінген. Бұл топ екі апта демалған соң алып қайтып, үшінші лекті аттандырамыз, – дейді «Қазкөліккәсіп» ҚБ Қызылорда филиалының маманы Асылбек Мыңжасаров.