Алғашқы үштік қатарында
Маңғыстау облысы бойынша меншікті тілші
ҚР Қарулы Күштерінің, Ұлттық қауіпсіздік қызметінің отыз жылдығына орай аудан әкімдігі өткізген шағын футбол сайысында теміржолшылар жеңіске жетіп, бастапқы үштікке енді.
Жарысқа Мұнайлы ауданында орналасқан түрлі мекемеден құралған он шақты команда қатысты. Солардың ішінде, кілең жауынгерлік даярлығы мықты ведомстволық командалар арасынан Маңғыстау темір жолының құрама командасы өзіндік ойынымен ерекшеленіп, қола жүлдені қанжығаға байлады. Маңғыстау вагон депосының инженер-технологы Наурызбай Байтұрақов «Үздік қорғаушы» номинациясына ие болды.
– Спорттық шараны Мұнайлы ауданының әкімдігі ұйымдастырды. Аудан орталығында өткен сайысқа желілік полиция, ішкі істер бөлімі, өрт сөндіру қызметі, сот, ұлттық қауіпсіздік қызметі, қорғаныс бөлімі, салық басқармасы, әкімдік пен мәслихаттан жалпы он команда қатысты. Біздің жігіттер бірінші орынды әскери комиссариаттың, екінші орынды ішкі істер бөлімінің жігіттеріне беріп қойғаны болмаса, өте жақсы ойын көрсетті. Үшінші орын да жаман көрсеткіш емес. Жеңімпаздарды аудан әкімі арнайы марапаттады, – дейді Маңғыстау теміржолының спорт нұсқаушысы Нұрайна Қыдырова.