Ауыспалы кубок ауыспады

Маңғыстау вагон пайдалану депосының әкімшілігі мен оған қарайтын техникалық қызмет көрсету пункттерінің жұмысшылары биыл да Наурыз мерекесінде шағын футболдан ауыспалы кубокты өзара сарапқа салды. Кубокты алуға Бейнеу мен Маңғыстау станциясының арасындағы барлық ТҚКП вагон қараушы-жөндеушілерден құралған бірнеше команда бәсекеге түсті.

Мерекелік марапатты еншілеу оңай болмады. Бейнеу, Сай-Өтес, Шетпе, Маңғыстау станциясындағы ТҚКП және депо әкімшілігіндегі шыңдалған жігіттерден сараланған топтар бір-біріне дес бермей, допты ерекше ептілікпен ойнап көрерменді таң қалдырды. Дегенмен, мықтыдан мықты шығып, бірінші орынды Маңғыстау станциясындағы вагон қараушылар командасы жеңіп алды. Екінші орын депо жігіттеріне, үшінші орын Шетпеден келген қонақтарға бұйырды. Осылайша, ауыспалы кубок ауысқан жоқ, өткен жылғы иесі – Маңғыстау ТҚКП жұмысшыларының командасында қалды.

Ерекше ойын көрсеткендер түрлі аталым бойынша марапатталды. Самат Құдасбаев – үздік ойыншы, Болат Шарқатбаев – сүрмерген, Бердіхан Смағұлов – үздік қорғаушы, Қонақбай Ұбайдұллаев – үздік қақпашы, Айладыр Садақбай – көрермен көзайымы, Наурызбай Байтұрақов – ардагер ойыншы аталымдарын алды. Жеңімпаз топтар мен номинация иегерлеріне кәсіподақтың қолдауымен бағалы сыйлық пен дипломдар табысталды.