Әлем чемпионы: Спортты серік еткен теміржолшы Еңбек озаттары қатарында
«Қазақстан теміржолшысы» газетінің тілшісі
Теміржолшы Рахат Жаңаниет «ҚР Еңбек озаттарының Алтын кітабы» республикалық байқауының 2-кезеңіне жолдама алды. Қазылар алқасының шешімімен оның жұмысы талапқа сай деп танылып, спорт саласында жеткен жетістіктері еленген.
Қарағанды электрмен жабдықтау дистанциясының электр механигі Рахат Берікұлы Ақадыр кентіңде дүниеге келген. Жастайынан әке-шешесіне көмектесіп, мал бағуға қолғабыс еткен ол соның арқасында шымыр болып өседі. Бұл спортқа бейім болуына ықпал етеді. 10 жасынан бастап самбо, дзюдо, қазақ күрес үйірмелеріне барып, біраз халықаралық турнирлерде жеңімпаз атанды. 2009 жылы оқушы кезінде-ақ 34 кг салмақ дәрежесінде Ташкент қаласында өткен самбодан әлемдік турнирде чемпион болды. Одан кейін Астана қаласында, Қырғызстанда өткен турнирлерде жеңіске жетеді. Ташкент қаласында жастар арасындағы жарыста Азия чемпионы болды. 2012 жылы мектеп бітіріп, Қарағанды политехникалық колледжіне оқуға түседі. Еңбек жолын жеке кәсіпорында электр монтер болып бастайды. 2018 жылы электр энергетикасы саласында жоғары білім алып шығады.
– Теміржолға 2016 жылы келдім, қыркүйектен бастап қазіргі жұмыс орным, ЭЧ-11 мекемесіне электрмеханик болып жұмысқа ауыстым. Қазір 7 жылдай осы салада қызмет етіп келемін, әрі спортты да бірге алып жүрмін. 2019 жылы халықаралық самбо турнирінде әлем чемпионы атандым. Сол жылы Кореяның Чхуанджу қаласында әлем чемпионатында қола жүлдегер атандым. 2021 жылы Ташкент қаласында өткен турнирде де әлем чемпионы болдым. Бұл Әлем чемпионаты менің ең үлкен биік тұғырдан көрінген сәтім болды. Бірінші белдесуде грек палуаны Каракизиди Саваны 2:0 есебімен жеңдім. Ол осы жарыстың басты қарсыласының бірі еді. Екінші белдесуді түрікмен палуаны Мухаммет Коссековпен өткізіп, оны 1:0 есебімен жеңіп жартылай финалға жолдама алдым. Үшінші белдесуді беларусс палуаны Гладких Павелмен өткізіп, оны 11:0 есебімен жеңіп ақтық сынға жолдама алдым. Финалдық кездесу 2018 жылы Бухарест қаласында өтті. Тәжік палуаны Кушкадам Хусравовты финалдық белдесуде 8:0 есебімен жеңдім. Сөйтіп шетелдерде көк туымызды желбіретіп, әнұранымызды әуелетіп қайттық, – дейді батыр теміржолшы.
Аталған «ҚР Еңбек озаттарының Алтын кітабы» республикалық байқауына қатысу үшін ол өңірдегі спорт басқармасына өзі туралы деректер жібереді. Байқауда бірнеше қатысушылармен қатар іріктеуден өтеді. Байқау қатысушылары ҚР Еңбек озаттарының Алтын төс белгісімен, Құрмет грамотасымен марапатталады. Жүлдегерлерге бұл марапаттары сәуір айында Астана қаласындағы Тәуелсіздік сарайында салтанатты түрде тапсырылмақ. Рахат секілді мықты спортшылардың арқасында елімізді әлем тануда. Сондықтан өз ісінің үздік мамандарын жастарға үлгі ету – өскелең ұрпақты еңбекқорлық пен отансүйгіштікке тәрбиелеудегі басты құрал. Қарапайым еңбек адамы бола тұра әлем чемпионы болып, елге танылған Рахат сияқты жастардың есімі мен еңбегі кеңінен насихатталып отыр.
