Жаңаөзендік теміржолшы мергендер сайысында топ жарды

ҚР Ұлттық спорт қауымдастығы және ҚР Садақ ату федерациясының қолдауымен «Бату Хан Жебесі» дәстүрлі садақ ату федерациясы Атырауда ұйымдастырған «Алтын орда» атты халықаралық турнирде жерлесіміз жеңімпаз атанды. 13 мемлекеттен келген 150 ойыншының  арасында өзін көрсете білген жаңаөзендік мерген теміржолшы Самал Зулпыхаров бірінші орын алды.  

Жаңаөзендік әріптесінің жеңісіне бүкіл маңғыстаулық теміржолшы бір кісідей қуанды. Аталған ұлттық спорт түрімен айналысуды бастағанына аз-ақ уақыт болса да осындай жетістікке жетіп отырған оның мықтылығын мойындап, өнеріне тәнті болды. Бұл Өзен станциясы бастығының орынбасары болып еңбек ететін Самалдың осы спортқа келген бір жыл ішінде жеткен бірінші жеңісі емес. Бұған дейін де түрлі байқауда 2-3 орындарды алғанды.  

– Менің бағытым «Жамбы ату» нысанасы бойынша 89 адам өнер көрсетті. Содан алдымен 16 адам бір бірімен сынға түсті. Мен алғаш туркиялық чемпионмен жарыстым. Оны жеңіп, башқұртстандық мергеннен де  үстем түстім. Содан кейін Азия чемпионы Ерлан Тапеновпен сынастым. Финалда өткен жолы біздің қалада өткен жарыста «Жамбы ату» нысанасы бойынша Қазақстан чемпионы атанған Мақсатпен шықтым. Сондай мықты қарсыластарды жеңіп, 13 мемлекет арасында өткен «Алтын орда» жарысында 30 метрге жамбы атудан чемпион атану маған бұйырыпты. Қарап отырсақ 89 қатысушының көбі неше дүркін чемпиондар, әлемдік деңгейге шығып, орын алып жүргендер де болды. Жалпы «Жамбы ату» елімізде шығарылған нысана түрі. Аттың үстінде атылатын жамбы да бар, бірақ ол жақын арақашықтықтан, біздікі 30 метрден. Жамбы нысанасының көлемі 25 сантиметр, ені 10 сантиметр болады. Оның бір қиыншылығы бір орында тұрмайтындығында. Жел болса да, жанынан оқ өтсе де екпінімен бір орында тұрмай, қозғалып, айнала беретіндіктен дөп басып тигізу оңай емес, – дейді жеңімпаз жерлесіміз.  

Еске сала кетсек, Самал көп қырлы теміржолшылардан. Спорттың осы ұлттық түрінен бөлек қол күресі, волейболмен де шұғылданады. Волейболдан Маңғыстау теміржолшылары құрама командасының белді мүшесі болса, қол күрестен жарыстардан бос қайтпаған ойыншы. Еңбектегі жетістігі де жаман емес. Бірнеше жылдан бері түбектегі Өзендей үлкен станцияның жұмысын жүргізуде басшыға қолғабыс етіп, орынбасары қызметін абыроймен атқарып жүр.