Бейнеу станциясында асық атудан сайыс өтті
Маңғыстау облысы бойынша меншікті тілші
Маңғыстау теміржолында республикалық жазғы спартакиадаға іріктеу жарыстары басталды. Ұлттық спорт – асық атудан саралау сайыстары жуырда Бейнеу станциясында өтті.
Онда Маңғыстау қосалқы бөліміне қарасты станциялар мен деполар ұжымынан, магистральдық желі бөлімшесіндегі дистанциялардан теміржолшылар бақ сынады. Бейнеудегі бес теміржол мекемесінен барлығы 21 адам қатысты.
– Жеңімпаздар спартакиадаға жолдама алатындықтан үміткерлер жақсы дайындықпен келіпті. Қызықты өткен жарыс барысында тауар кассирі Меруерт Қабиева спартакиадаға жолдама ұтып алып, «Алтын сақа» белгісімен марапатталды. Бейнеу станциясы ұжымынан Ерсайын Өмірғалиев бірінші орын, вагондарға техникалық қызмет көрсету пунктінен Тұрар Ниязов екінші орынды, Бейнеу жол дистанциясынан Айбек Оразбаев үшінші орын алды. Олар диплом және қаржылай сыйлықпен марапатталды, – дейді Маңғыстау теміржолының спорт нұсқаушысы Нұрайна Қыдырова.
Енді келесі айдың басында Маңғыстау станциясында шағын футболдан іріктеу кездесуі ұйымдастырылады. Ал оған дейін түбек теміржолшылары Бурабайда жиырма команда арасында волейболдан өздерін сынамақ.
