Маңғыстауда «Наурызнама» онкүндігі аясында спорттық сайыстар өтті
Маңғыстау облысы бойынша меншікті тілші
Маңғыстау темір жолында Қазақстан темір жолының 120 жылдығына орай «Наурызнама» онкүндігі аясында бірнеше жерде спорттық сайыстар өтті.
Соның ішінде ұлттық спорт күні теміржол мекемелері арасында «Асық ату», «Бес асық», «Тоғызқұмалақ» ойындарынан іріктеу болды. Маңғыстау станциясындағы «Жеңіс» спорт кешенінде ұйымдастырылған сайыста қорытынды есеп бойынша асық атудан 1-орынды Ерсайын Өмірғалиев, 2-орынды Ниязов Тұрар, 3-орынды Серік Кенжеханов иемденді. Бес асықтан Айнұр Искалиева мен Жарасхан Түлкібаева жүлдегер атанды. Тоғызқұмалақтан ерлер арасында Жайлаубай Жалғасбаев, Әнуар Жақсыбаев, Ғалымжан Нұрболдың, әйелдер арасында Айгүл Аяпова, Айнұр Нұрмаханованың асығы алшысынан түсіп, жеңімпаз болды. Бас жүлдеге ие болғандар Қарағанды қаласында өтетін ұлттық спорт чемпионатына жолдама алды.
Ал Бейнеуде білекті балуандар күш сынасып, «Теміржол барысы-2024» анықталды. Қазақ күресінен өткен бұл бәстесуде теміржолшы жігіттер үш түрлі салмақта – 66, 80 және +80 келі дәрежесі бойынша күресті. 66 келі салмақта алғашқы үш жүлделі орынды Тұрар Ниязов, Нұрбек Базаржанов, Досан Жұбандық сынды теміржолшылар алды. Қалған екі салмақ дәрежесі бойынша жүлделі орындар Бауыржан Ботабаев, Әлібек Седуов, Асылбек Нұғметов, Мейрамбек Марханбетов, Еркінбек Сүйенбаев, Еламан Асқанбай есімді жігіттердің еншісіне тиді.
– Наурыз мерекесіне орай бейнеулік спорт нұсқаушы Бақытжан Нұралиевпен бірге әр жерде спорттық сайыстар ұйымдастырдық. Теміржолшылар арасында салауатты өмір салтын насихаттау бағытында өткізілген бұл бәсекелердің бәрі де кәсіподақтың қолдауымен мерекелік көңіл-күйде, жоғары деңгейде өтті. Маңғыстау станциясында асық ату, тоғызққұмалақ, Бейнеуде Қазақ күресі сынды жарыстар өтсе, Жаңаөзен қаласындағы теміржолшыларымыз арасында футболдан мықтылар анықталды. Өзен станциясында керемет футбол турнирі өтті. Жарыс қорытындысы бойынша Маңғыстау жол дистанциясының жігіттері бірінші, Өзен айналым депосының ойыншылары екінші, Маңғыстау белгі беру және байланыс дистанциясының жұмысшылары үшінші орындарды иемденді. Жеңімпаздардың барлығы марапатталды, мереке құрметіне қатысқандарды да сый-сияпатсыз қалдырамадық, – дейді Маңғыстау теміржолы бойынша спорт нұсқаушысы Нұрайна Қыдырова.
