Қызылордада теннис турнирі өтті
Қызылорда облысы бойынша меншікті тілші
Қызылорда қаласында теміржол саласының қызметкерлері арасында үстел теннисінен өткен спорттық жарыс «Қазкөліккәсіп» ҚБ Қызылорда филиалының және салалық мекемелердің кәсіподақ ұйымдарының қолдауымен ұйымдастырылды.
Турнирдің ашылу салтанатында сөз сөйлеген кәсіподақ филиалы төрағасы Бауыржан Ахметов пен спорт секторының үйлестірушісі Бақытжан Имбергенов қатысушыларға жарыс ережелерін түсіндіріп, сәттілік тіледі. Олар бұл шараның теміржолшылар арасында бірлік пен ынтымақты арттыруға, денсаулықты нығайтуға қосар үлесі зор екенін атап өтті.
– Жылдық жоспар аясында өткен бұл турнирге 5 мекемеден 10 ойыншы қатысып, «пинг-понг» үстелінің айналасында өз шеберліктерін ортаға салды. Әр ойыншы өз қарсыласымен әр раунд сайын тартысты матч өткізіп, шеберлік пен төзімділіктің, жылдам рефлекс пен дәлдіктің жоғары үлгісін көрсетті. Турнир швейцарлық жүйе негізінде өткізіліп, ойыншылар әр кезеңде әртүрлі қарсыласпен кездесіп, өз мүмкіндіктерін жан-жақты көрсетті. Ойын барысында қатысушылар жылдам реакция, дәлдік және тактикалық ойлау қабілеттерін байқатты. Матчтар барысында «форхенд», «смэш» және «спин» сынды үстел теннисі элементтерін қолданып, әрбір ойыншы сәтті өнер көрсетті. Турнирдің қорытындысы бойынша, Қызылорда ЖТ бөлімшесінің инженері Талғат Сыздықов үздік ойын өрнегін көрсетіп, жеңіске жетті. Оның бұл жетістігі көп жылғы еңбегінің, спортқа деген сүйіспеншілігінің және тұрақты жаттығуларының нәтижесі екені сөзсіз, – дейді Бақытжан Имбергенов.
Көпшілік қызыға тамашалаған финалдық кезеңде теннис добының үстел үстімен сызықшадай ұшқындап, қарсы шабуылдар мен ұрымтал сәттер алма-кезек орын алып отырды. Турнир қорытындысы бойынша 1-орынды жоғарыда аталған Талғат Сыздықов иеленсе, 2-орын Қызылорда станциясының ойыншысы Әмірбек Матжановқа бұйырды, ол әр матчта қарсыластарын қарымды спиндер мен күтпеген смэштермен таңғалдырды. 3-орынды Белкөл станциясының теміржолшысы Айшиков Айбек жеңіп алып, мықтылар үштігін түйіндеді.
Жарыс соңында жеңімпаздар мен жүлдегерлерге арнайы марапаттар табысталып, қатысушылар естелік суретке түсті.
