Семейде Республика күніне орай үстел теннисінен біріншілік өтті
Абай облысы бойынша меншікті тілші
Теміржолшылар Республика күні мерекесіне орай үстел теннисінен жекелей және командалық біріншілік өткізді. Бөлімшенің кәсіподақ ұйымы ұйытқы болған бұл бәсеке бір есептен салалық кәсіподақтың 120 жылдық мерейтойымен орайластырыла ұйымдастырылды.
Бұл күні байтақ желі бойынан келген теннисші теміржолшылар қауымы Семей қаласындағы ең үздік теннис клубына жиналып, өзара шеберлік сынасты. Айта кетерлігі, осынау бәсекеге бұрыннан бері үстел теннисін серік етіп жүрген кіл спорт шеберлері жиналған болатын. Сондықтан да болар, сайыс барысы өте тартысты әрі қызықты өрбіді. Байқауға барлық мекемеден жанкүйерлер де мол жиналды.
Десекте қазылар алқасына біріншілік жеңімпаздарын анықтау қиынға түскен жоқ. Көп ұзамай-ақ үздіктер қатары мәлім болды.
Атап айтсақ, қыздар арасында өткен жекелей сында осыған дейін бірнеше дүркін бөлімше және қала мен облыс чемпионы атағын жеңіп алып жүрген жергілікті «Қазтеміртранс» Семей филиалының жас спортшысы Айгерім Тоқпанова бірінші орынды иеленді. Екінші орынды бұрын танылмаған жас есім НОД-ЖТ қызметкері Анар Мұстафағалиева алса, жүлделі үшінші орынға НЖС-6 бөлімшесінен қатысқан Айгерім Қайнарқызы лайық деп танылды.
Сол тәрізді ерлер арасындағы өткізілген әр жастағы сында ТЧЭ-24 мекемесінен келген Рустам Сұлтанбеков пен ШЧ-29 байланысшысы Рустам Мұхаметжановтар бірінші орынды айқын басымдықпен жеңіп алды. Ал, екінші орынды Семей станциясынан Ернат Алин мен Асқар Есенаманов иеленсе, жүлделі үшінші орын ТЧЭ-24 мекемесінен келген Қайрат Қарақанов пен НЖС-6 қызметкері Бауыржан Көкенов сынды әуесқой теннисшілерге бұйырды.
Осы орайда команалық есеп бойынша бас жүлдені Семей магистральдық желі бөлімшесі алса, екінші орынды ШЧ-29 мекемесі иеленді. Үшінші орынға Семей локомотив пайдалану депосы лайық деп танылды.
Барлық жеңіпаздарға салалық кәсіподақ ұйымының атынан бағалы сыйлықтар мен мақтау грамоталары салтанатты түрде табыс етілді.
