Ақтөбе станциясында теміржолшылар арасында футболдан турнир өтті

Ақтөбе станциясында белсенді жастардың бастамасымен станция қызметкерлері арасында шағын футболдан «Ақтөбе станциясы кубогі» ұйымдастырылды. Спорттық шара ұжымдағы ынтымақты нығайтып, салауатты өмір салтын насихаттауға бағытталды.

Жарысқа станцияның түрлі бөлімшелерінен құралған алты команда қатысып, жасыл алаңда өзара бақ сынасты. Барлық команда жоғары деңгейдегі ойын өрнегін көрсетіп, жанкүйерлер қызықты да тартысты кездесулерге куә болды. Әр матчта спорттық рух пен өзара құрмет сақталып, қолдауға келген теміржолшыларға әсерлі сәттер сыйлады.

Жарыс қорытындысы бойынша бірінші орынды «Бекет» командасы иеленді. Екінші орынға «Южпромснаб» командасы тұрақтаса, үшінші орынды «Вагон құрастырушылар» командасы еншіледі. Жеңімпаздар мен жүлдегерлерге кубоктар мен арнайы марапаттар табысталды.

– Теміржол саласы – тәртіпті, төзімділікті және үлкен жауапкершілікті талап ететін сала. Ал спорт – дәл осы қасиеттерді шыңдайтын, ерік-жігерді нығайтатын орта. Сіздер осы екі бағытты қатар алып жүріп, нағыз теміржолшыға тән қайсарлық пен бірлікті көрсетіп жүрсіздер. Әр жарыста сіздер тек өз шеберліктеріңізді ғана емес, ұжымның намысын, команда абыройын қорғадыңыздар. Командалық рух, өзара қолдау, жеңіске деген сенім – жетістіктеріңіздің басты кепілі. Алдағы уақытта да биік белестерді бағындырып, теміржолшылардың спорттағы да әлеуеті жоғары екенін дәлелдей берулеріңізге тілектеспіз, – деді станция басшысы Нұрлан Ермағамбетов.

Спорттық шараны ұйымдастыруға ұйытқы болған Асхат Көптілеуов бастаған белсенді жастарға алғыс айтылып, мұндай игі бастамалардың алдағы уақытта да жалғасын таба беретініне сенім білдірілді.