Қыс қызығы – «көңілді старт»

Шығыстағы Семей магистральдық желі бөлімшесіне қарасты мекемелер бойынша қысқы спорттық ойындар маусымы басталды. Бұл жолғы дәстүрлі іс-шараларды кластан тыс Семей станциясының теміржолшылары бастады.

Ақпан айы таяған шақта семейлік сала қызметкерлері бос уақыттарын жасыл орман ішінде тиімді өткізуді дәстүрге айналдырған. Бұл жолы барша станция қызметкерлері мекеменің салалық кәсіподақ ұйымының ұйытқы болуымен жарыс жолына шықты. Дұрысы – қыс мезгіліндегі көңіл көтерудің ең тиімді жолына көшті.

Қысқы Ертіс өзенінің жағалауы мен қар жамылған мүлгіген қарағайлы орман – жанға дауа. Көз тойдырар көркем табиғат аясында орын тепкен демалыс базасына келген теміржолшылар қауымы «Локомотив» спорт клубының нұсқаушысы Наталя Мешкованың ұйымдастыруымен «көңілді старт» ойындарын өткізді. Бірнеше топқа бөлінген қозғалысшылар қауымы саф ауа аясында өзара шеберліктерін, ептіліктерін сынға салды. Бір бұл емес, арнайы әзірленген төбешіктен жарыса сырғанақ теуіп бір сәт балалық шаққа да қайта оралғандай әсерге бөленді.

– Жұмыс жүйелі жүруі, қызметке деген ынта-ықыластың артуы үшін демалыс сәттерін дұрыс өткізудің маңызы аса зор. Стрестен арылып, ой-сананы серпілтуде қысқы орман ішіндегі демалысқа ештеңе жетпейді. Теміржолшыларымыздың бос уақытын тиімді өткізуі үшін бүгін ерекше іс-шара ұйымдастырдық. Бұл бір есептен алдағы уақыттарға жоспарланып отырған, тек теміржолшылар арасында ғана емес, қала бойынша өткізілетін «кәсіподақ шаңғысы», «президенттік тест» сынды көптеген қысқы спорттық ойындар алдындағы бой ширату, дайындық десек те болады, – дейді бұл орайда бастаманың негізгі ұйымдастырушысы Семей станциясы кәсіподақ комитетінің төрайымы Шәрбат Мейірманова.

Сонымен қатар, бұл күні «Елімай» демалыс базасында станция қызметкерлері үшін мекеменің кәсіподақ ұйымының демеушілігімен арнайы дастархан жайылып, ақ тілектер тиегі ағытылды. Сөз жоқ, ұжымның береке-бірлігін нығайтуда мұндай шаралардың берері мол екені анық.