Шаңғы жолындағы жарыс
Абай облысы бойынша меншікті тілші
Семейлік теміржолшылар қысқы спорттық сайыстар бойынша өңірде ұйымдастырылып жатқан барлық бұқаралық іс-шараларға қатысып, ұлттық компанияның туын биіктен желбіретіп жүр.
Жуырда аймақтағы барлық мекемелер арасында шаңғы жарысынан «Спорт – терроризм мен экстремизмге қарсы» атты ұранмен біріншілік болып өтті. Жалпы саны 500-дің үстінде әуесқой және кәсіби шаңғышылар қатысқан жарыс жолына семейлік теміржолшылар да шықты. Қатысушылардың жас ерекшелігі 8 жастан 50 жасқа дейінгі аралықты қамтыған болатын.
Спорттық доданың мақсаты – мекемелер мен ұжымдар арасында салауатты өмір салтын насихаттап, бүгінгі қоғамда терроризм мен экстремизмге қарсы ұстанымды қалыптастыру болатын. Жергілікті теміржолшылар қауымы осыған дейін бірнеше мәрте шаңғы сайысына қатысып, бабына келген болатын. Мәселен, 50 жастан жоғары санаттағы ерлер арасында өткен жарыста бөлімшенің өндірістік-техникалық бөлімінің бастығы, желаяқ спортшы Нұрлан Бегадилов жүлделі екінші орынды иеленді.
Жалпы, облыстың әр түкпірінен кіл мықтылар жиналған аталмыш сайыс барысында теміржолшылар береке-бірліктерін көрсетіп, ерекше белсенділік танытты. Жеңімпаздар мен жүлдегерлерге арнайы тағайындалған дипломдар мен медальдар табысталды.