«NAURYZ FEST»: Ұлттық өнер сайысы
«Қазақстан теміржолшысы» газетінің тілшісі
«Наурызнама» онкүндігі аясында Ұлттық спорт күніне орай «ҚТЖ» ҰК» АҚ Тасымалды басқару дирекциясы «Nauryz Fest» мерекелік өнер сайысын ұйымдастырды. Дирекцияның аппарат басшысы Әділхан Дәкенов көпшілікті наурыз мейрамымен құттықтап, дүбірлі додаға қатысушыларға жеңіс пен сәттілік тіледі.
Дирекцияға қарасты бөлімдерден 4 команда жасақталған сайыста ұлттық спорттың 6 түрінен сайыс өтті. РЦУП – Солтүстік өңірлік Пойыздарды басқарудың аймақтық орталығының «Тәуекел» командасы, АЦУП, яғни Пойыздарды басқарудың автоматтандырылған орталығының «Көктем қаһармандары» командасы, ЦД – дирекцияның өзінен «Қазақ рухы» командасы және ЦВ, яғни вагон шаруашылығы орталығының «Вагонный апгрейд» командасы сайланып шығып, асық ату, қол күресі, ләңгі тебу, гир көтеру, арқантартыс, мас-рестлинг бойынша өзара бақ сынасқан сайыс эмоциялық көңіл-күйге толы, қызу да тартысы өрбіді.
Жарыс шарты бойынша қатысушылар ұлттық нақыштағы киім киді, әр команда құрамында 4 ер және 2 әйел болу міндеттелді. Қазылар алқасы төрт команданың да ойынын әділетті бағалап, ұпай санын шектемеуге тырысты. Сайыс соңында командалардың атауы мен киім үлгілері де есепке алынды. Нәтижесінде 1-орынға «Вагонный апгрейд» командасы ие болды. Ал 2-орынға диспетчерлер орталығының «Тәуекел» командасы табан тіреп, 3,4-орындарға «Көктем қаһармандары» мен «Қазақ рухы» командалары лайық деп танылды. Барлық командалар арнайы дипломмен марапатталып, Наурыз құрметіне бағалы сыйлықтарға ие болды.
