Сенбі сайын сайыс

«ҚТЖ» ҰК» АҚ Әлеуметтік саясат департаменті компанияның спорттық-бұқаралық қызметін ұйымдастыру шеңберінде бірнеше спорт түрінен жарыс ұйымдастыруда. Ол алдыңғы сенбіде волейбол сайысынан басталды.

Ұйымдастырушылардың айтуынша, жарысты өткізудегі басты мақсат – ҚТЖ бойынша волейболдан биыл 27-30 сәуір аралығында өтетін республикалық чемпионатқа Астанадан қатысатын құрама команданың ең үздік ойыншыларын іріктеу. Компанияның бас ғимаратындағы спорт залда өткен жарыс өте тартысты болды. Барлығы 6 команда – Магистральдық желі дирекциясы, Астана станциясы, «ҚТЖ-Жүк тасымалы» ЖШС, Бас есептеу орталығы, Қазтеміртранс және ЦД командаларының ешқайсысы да осалдық танытпады. Нәтижесінде 1-орынды Магистральдық желі дирекциясы командасы иеленсе, 2-орын Астана станциясына және 3-орын «ҚТЖ-Жүк тасымалы» ЖШС командасына берілді. Жүлдегерлер жарыстың арнайы дипломы, кубогы және бағалы сыйлықтармен марапатталды.  

Ал өткен аптада асық ату мен тоғызқұмалақтан іріктеу туры өтті. Оның нәтижесінде 1-орынды – ЛЖС, 2-орынды – ЦЖС, 3-орынды ЦД алса, бес асықтан 1-орын «ҚТЖ-Жүк тасымалы» ЖШС қызметкері Гаухар Нарымбаеваға, 2-орын – Гүлзада Тұрғалиеваға (ЦДИП), 3-орын Жадыра Айтеноваға (ЦЖС) берілді. Тоғызқұмалақтан әйелдер арасында 1-орынды Астана станциясының қызметкері Айнұр Ғаббас алса, ерлер арасында 1-орынды осы станциядан Самит Еркiн иеленді.  

Алдағы сенбіде асық ату мен тоғызқұмалақтан, одан кейінгі аптада арқан тарту, шахмат және армрестлингтен жарыс өтеді деп күтілуде.