«Толағай» – отбасылық сайыс

Атырау электрмен жабдықтау дистанциясында 1 мамыр – Қазақстан халқының бірлігі күні мен 28 сәуір – Дүниежүзілік еңбекті қорғау күні құрметіне «Толағай» атты отбасылық сайыс өткізілді.

Теміржолшылар арасында салауатты өмір салтын қалыптастыруда маңызды фактор болып табылатын спортты дамыту мақсатында кәсіподақ тарапынан ұйымдастырылған іс-шараға дистанция жұмысшылары мен қызметкерлер отбасы, бала-шағасымен қатысты. Дистанцияның аймақтардағы аудандық желілері: Атырау, Мақат, Аққыстау, Ганюшкино, АУР, ЭЧЦ, Құлсары, Боранқұл, Сағыз, РРУ, мехцех – барлығы 9 мекеме сайысқа бір-бір отбасыны таңдап, бәйгеге қосты.  

Қатысушылар жеребе арқылы 3 командаға біріктіріліп, ойын басталмас бұрын кәсіподақ төрағасының орынбасары А.Төлеген ойын түрлерімен, ережесімен және тәртібімен таныстырып өтті. Барлығы тоғыз түрлі ойын түрлері бойынша сайысқа түскен командалардың осалы болған жоқ, бір-біріне дес бермей әкесі де, анасы да, баласы да тек жеңіске ұтылған сайыс аса қызықты, шулы да тартысты өткені соншалықты, жанкүйерлердің дауысы қазылар алқасын да естіртпей жатты.  

Баскетболшы, волейболшы, хоккейші образына кіріп, теннис ойнап, шеңбермен өнер көрсетіп, жіппен секіріп, қаппен жүгіріп, ептілік пен шеберліктің сан үлгісін көрсеткен командалар ең соңында арқан тартысқа кірісті.  

– Бір мекемеде еңбек етсе де станцияларда шашылып орналасқан желілік аудандарда еңбек ететін жұмысшылар бас қосып, командалық рух мен отбасы, атаана құндылығын, достық пен өзара сыйластық сынды қадір-қасиеттер алға шыққан бүгінгідей іс-шаралардың орны бөлек. Мерекелік көңіл күйде бәріміз бір серпіліп қалдық. Барлық қатысушыларға да, ұйымдастырушыларға да алғыс айтамын, – деді Атырау электрмен жабдықтау дистанциясының бастығы Б. Досжанов.  

Оза шауып бәйге алған командалар грамоталармен және бағалы сыйлықтармен марапатталды. Кәсіподақ комитетінің төрағасы Н.Махметова болашақта тау көтерер толағайлар болатын командалардың ең жас ойыншылары – балаларға сыйлық таратты.