Тараз теміржолшылары арасында тораптық спорт жарысы өтті
"Қазақстан теміржолшысы" газетінің Жамбыл облысындағы меншікті тілшісі
«Қазтеміржолкәсіп» ҚБ Жамбыл филиалының спорт нұсқаушыларының ұйымдастыруымен ауыр және жеңіл атлетиканың кір тасын көтеру, ұзындыққа секіру түрлері бойынша тораптық жарыстар өтті.
Тараз станциясында өткен спорттық іс-шара тартысқа толы болды. Әсіресе ауыр еңбекте шыныққан теміржолшылар кір тасын көтеруде бәсекені қыздыра түсті. Кір тасын көтеру спорты бойынша жарыстарда жүлделі орындарды Тараз көлік оқу орталығының курсанттары Қанат Нұрмұратов, Әлихан Қожан және Нұржан Айтпенбетов өзара бөлісті.
Ал ұзындыққа секіру жеңіл атлетикаға жатқызылғанымен, техникалық жағынан аса күрделі. Содан да болар, олимпиадалық жүйеге енген бұл спорт түрінен үздіктерді анықтау оңайға соққан жоқ.
Кәсіподақ ұйымының спорт нұсқаушысы Евгений Тянның айтуынша, ұзындыққа секіру – тактикадан бұрын күш пен серпінділікті талап ететін спорт. Әйтсе де, физикалық мүмкіндіктермен қатар, психологиялық ішкі дайындық та қажет екен.
Ұзындыққа секіру кезінде ШЧ-36 Жамбыл белгі беру және байланыс дистанциясының жеңіл атлеттері Зарина Анарбекова мен Ақбота Ембергеноваға дес берген жалғыз спортшы «Жамбыл магистральдық желі бөлімшесі» филиалының сылақшысы Айсұлу Сұлтанова болды.
Жарыс қорытындысында сылақшы Сұлтанова жеңіс тұғырына көтерілсе, дистанцияның электромеханигі Зарина Анарбекова мен инженер Ақбота Ембергенова екінші, үшінші орындарды бөлісті. Кәсіподақ ұйымының филиалы атынан жүлдегерлерге бағалы сыйлықтар табысталып, грамоталар, медальдармен марапатталды.