Жеңіл атлетикадан 100 метр қашықтыққа жүгіруден теміржолшының баласы жүлдегер атанды
Маңғыстау облысы бойынша меншікті тілші
Маңғыстау облыстық чемпионатында мүмкіндігі шектеулі спортшылар арасында жеңіл атлетикадан 100 метр қашықтыққа жүгіруден теміржолшының баласы жүлдегер атанды. Маңғыстау жүк тасымалы бөлімшесінің кәсіподақ комитеті төрағасы бұл жағымды жаңалықты үлкен мақтанышпен жеткізді. Себебі жеңімпаз жасөспірім олардың көз алдында өсіп, ауруға мойымай, қайсар мінезімен жетістікке жеткен жігерлі бала екен. Маңғыстау жүк тасымалы бөлімшесі бойынша бүгінде мұндай мүмкіндігі шектелген жетпіске жуық теміржолшылардың балалары бар екен. Солардың әрбірінің хал-жағдайы үнемі кәсіподақ бақылауында. Бөлімшенің кәсіподақ комитеті төрағасы Әзірбай Тұрмағанбетов мұндай табандылық кейбір дені сау балалардың да қолынан келе бермейтінін айтады. − Маңғыстау жүк тасымалы бөлімшесінде логистиканы қамтамасыз ету бөлімінің бастығы Айбек Утековтың ұлы Әлішер Құмаров жақында өткен облыстық чемпионатта екінші орын алды. Бала кезінен ДЦП диагнозы қойылған ол өзін ауру сезінбейді, өмірге құштар. Бұған дейін де біраз жарыстардан топ жарып жүр еді. Осы жылы Тәуелсіздіктің 30 жылдығына және балаларды қорғау күніне орай қол күресінен жасөспірімдер мен жас жеткіншектер арасында өткізілген қалалық ашық жарыста бірінші орынды иеленді. Ақтау қаласында ұйымдастырылған Қажымұқан Мұңайтпасовтың 150 жылдығына орай қол күресінен жасөспірімдер мен жас жеткіншектер арасындағы сайыста да бірінші орынды қанжығаға байлады. Жеңіс күніне және мотомаусымның ашылуына байланысты өткен қол күресінде екінші орыннан көрінді. Наурыз мерекесінде гір спорты мен қол күресінен ашық жарыста бірінші орынды жеңді. Үнемі алғы шептен көрініп келеді. Бұл бізді ерекше қуантады. Баланы спортқа баулып, өмірге құлшынысын арттырып, осындай жетістікке жетуіне ықпал еткен ең алдымен оның ата-анасының еңбегі, – дейді Маңғыстау жүк тасымалы бөлімшесі кәсіподақ комитетінің төрағасы. 17 жасар жеткіншек спортқа жастайынан келген. Бірнеше түрімен қатар айналысады. Бәрінен де жоғары нәтижесі бар. Ата-анасының айтуынша, ол спортты жанына серік еткелі өмірі өзгеріп, өзін өзге балалардан ерекше деп санамайтын болған. − Бала кезінен көп жыл емдеттік. Аяғына тұра бастағасын спортқа баулыдық. Қалалық мүмкіндігі шектеулі балаларға арналған спорт мектебіне бердік. Өзім жастайынан шашка, шахмат ойнауға үйреттім, үмітіміз көп, – дейді чемпион ұлдың әкесі. Әлішердің компьютерге де қабілеті жақсы екен. Болашақтағы арманы – жоғары оқу орнын бітіріп, бір мамандықтың иесі болу. Мүмкіндігі шектеулі балаларды спортқа баулып, алға жүруге мотивация беру.