Бұрынғы теміржолшы мүмкіндігі шектеулі жандар арасында үстел теннисінен өткен спартакиада жеңімпазы атанды
Маңғыстау облысы бойынша меншікті тілші
Маңғыстаулық бұрынғы теміржолшы Мейірбек Өтепов үстел теннисінен түбектің алғашқы чемпионы атанды. Ол тірек қимыл аппараты зақымданған спортшылар арасында өткен Қазақстанның VI спартакиадасының алтын медалін жеңіп алды. Мейірбектің тағдыр тауқыметінен теміржолдағы арманы орындалмаса да, спорттағы жұлдызы жарқырай түсуде. Олай дейтініміз, бұдан он жыл бұрын теміржолдағы еңбек жолын бастаған жалындаған жас жігіттің бір-ақ жылдан кейін мамандығымен қош айтысуына тура келді. Өз міндетін атқару кезінде вагондардың астында қалып қойып, бір қолы мен бір аяғынан айырылды. Солай болса да жігерін қайта жанып, өзін өзге қырынан көрсете білген ол бұдан төрт жыл бұрынғы спартакиадада спорт шеберіне үміткер болған еді. Енді бірден екі алтынды алып, спорт шебері дәрежесін орындады. Ол жеке сында да, топтық жарыста да бірінші орыннан көрінді. 170 спортшы қатысқан дүбірлі додада мұндай нәтиже көрсету екінің бірінің қолынан келе бермесі анық. Бұл хабарға бәрінен бұрын оның бұрынғы әріптестері – теміржолшылар қуанып, жаңалықты бірінен соң бірі хабарлап жатты.
– Төрт жылда бір рет болатын жарысқа дайындалуға уақыт жеткілікті еді. Дегенмен жүлдені жеңіп алу оңай болған жоқ. Қарсыластарым мықты, халықаралық деңгейде атағы бар, шетелдерге шығып жүргендер, бірнеше рет чемпион болғандары бар. Бес турдан өтіп, финалда атыраулық спортшымен кездестім. Топтық сайыста Алматы облысының спортшыларымен ойнап, 3:0 есебімен жеңдік. Бізге қарсы шыққан екі спортшының біреуінде халықаралық дәрежесі бар, екіншісі спорт шеберіне үміткер. Еңді алға қойған мақсатым – Азия ойындарын бағындырып, паралимпиадаға қатысып, жеңімпаз болу, – деген Мейірбек Өтепов, жанкүйерлеріне қолдап, сенім білдіргендері үшін алғысын жеткізді.