Канар аралдарында темір жол желісі салынады
Өткен аптада Испанияның көлік және тұрақты мобильділік министрі Хосе Антонио Кансано Канар аралдарының билігімен Тенерифе және Гран Канария сияқты екі аралында теміржол желісін салудың экономикалық тиімділігін талдайтын жұмыс тобын құру туралы келісімге қол жеткізілгенін хабарлады.
Канар аралдарының өкілдері атап айтқандай Испанияның көлік индустриясын көміртексіздендіру мақсаттарын шешу барысында аралдарда тұрақты мобильділікті ілгерілететін Гран Канария және Тенерифе астаналарын тиісті әуежайлармен байланыстыратын рельстік жүйелер жобаларын талқылады. Атап айтқанда, Гран Канария аралында Лас-Пальмас-де-Гран Канарияның әкімшілік орталығынан әуежай арқылы Мелонерас курорттық аймағына дейін ұзындығы 57 км болатын 1688 мм калибрлі темір жол құрылысының жоспары әзірленді.
Жоба әлі 2009-2018 жылдар аралығында жергілікті және федералдық арналардан 22,4 млн еуро көлемінде қаржылық қолдау алған. Алайда тендерге және одан кейінгі құрылыс жұмыстарына қатысты бұдан әрі ілгерілеу болмаған. Себебі 2019 жылғы есеп бойынша желі құрылысына қажетті 1,65 миллиард еуро көлеміндегі қаражатты алуға байланысты қиындықтар болған.
Айта кетсек, Канар аралдары Атлант мұхитындағы аралдар тобына жатады. Испанияның 17 автономдық облыстарының бірі. Африканың солтүстік-батыс жағалауынан 100 – 120 км жерде. Канар аралдарын мәңгі жасыл орман мен бұталар көмкерген. Эндемик өсімдіктер көп. Олардың қатарына дракон ағашы, Канар құрма пальмасы мен қарағайы жатады. Жергілікті тұрғындар банан, картоп, цитрустар, жүзім, темекі, астық және бұршақ тұқымдастарын өсіреді, сиыр, ешкі, қой ұстайды. Аралда ұлттық саябақтар орналасқан. Аралдарда теңіздік климаттық курорт дамыған. Ірі қалалары: Лас-Пальмас және Санта-Крус-де-Тенерифе. Олар Еуропалық экономикалық қоғамдастыққа елдің бір бөлігі ретінде біріктірілген. Дегенмен, бұл мүшеліктің аралдардың ара-қашықтығына, экономикалық және тарихи-дәстүрлік ерекшеліктеріне байланысты өзіндік өзгешеліктері де бар.
Әдемі табиғат, жылы климат және жағажайлар аралдарға көптеген туристерді тартады. Жыл сайын аралға шамамен 12 миллион адам келеді екен.