CAF компаниясы жаңа Oxygène электр пойызын таныстырды
CAF компаниясы мен Францияның ұлттық теміржол операторы SNCF Voyageurs жаңа Oxygène электр пойызын таныстырды. Бұл пойыздар TET ұлттық желісінің қалааралық бағыттарына арналған, деп хабарлайды Rail-news.kz.
Жаңа пойыздар ескі Corail вагондарымен жүретін құрамдарды алмастырады. Олар Париж – Клермон-Ферран, Париж – Лимож – Тулуза және Бордо – Тулуза – Марсель бағыттарында жүретін болады. Жаңа пойыздар жоғары жылдамдықты емес, қарапайым теміржол бағыттарында қозғалады.
Жобаны қаржыландыру мемлекет тарапынан жүзеге асырылады. Алғашқы 28 пойызға арналған келісімшарт 2019 жылы жасалған, алайда техникалық қиындықтарға байланысты іске қосу 2027 жылғы наурызға шегерілді.
2024 жылдың соңында қосымша 22 пойызға тапсырыс берілді, оларды сол жылы пайдалануға беру жоспарланып отыр. Бұл жұмыс күндері негізгі бағыттардағы рейстер санын арттыруға мүмкіндік береді.
Париж – Клермон-Ферран бағыты бойынша күніне 9 пойыз жұбы, ал Париж – Лимож бағытында 11 пойыз жұбы қатынайды деп жоспарлануда. 2028 жылы оператор таңдалған соң рейстер жиілігі артуы мүмкін.
Oxygène пойызы 10 вагоннан тұрады және 420 жолаушыны тасымалдай алады, оның ішінде бірінші класта – 103 орын (бұл бұрынғы пойыздарға қарағанда 20 орынға артық).
CAF жолаушылар жайлылығын арттыру үшін заманауи технологияларды енгізуде:
Жолаушылар салонында эргономикалық орындықтар, брондау индикаторлары, Wi-Fi, тоқкөзі мен USB-порттар орнатылған.
Мүмкіндігі шектеулі жандар үшін екі класта да арнайы орындар қарастырылған.
Орталық вагонда электровелосипедтерді зарядтауға арналған 10 велосипед тұрағы бар.
Сондай-ақ алғаш рет машинист кабинасынан көрініс беретін экрандар орнатылған.
Пойыздар бейнебақылау жүйелерімен және нақты уақыттағы ақпараттық жүйелермен жабдықталған. Жобаға салынған жалпы инвестиция шамамен 1,5 миллиард еуроны құрайды. Бұл қаржыға пойыздардан бөлек, депо құрылысы мен теміржол желілерін жаңарту да кіреді.