Ресей Арктикадағы теміржол желісін дамытуға ниетті
Ресей билігі Арктика полигонының теміржол инфрақұрылымын дамытуға қатысты ұсыныстар әзірлеуге кірісті, деп хабарлайды Rail-news.kz.
Бұл туралы үкімет қаулысында айтылған, деп жазды ТАСС.
Бастамаларды әзірлеумен Ресей Көлік министрлігі, Ресей ғылым академиясы және теміржол саласының өкілдері айналысады. Алғашқы нәтижелер, оның ішінде үкіметке арналған есеп дайындау, 2026 жылы күтіледі.
Басты бағыттардың қатарында Оңтүстік Сібірдің өнеркәсіптік аудандары мен Транссібір магистралін Арктикада орналасқан порттармен байланыстыратын жаңа көлік дәлізін құру көзделген. Сондай-ақ Лена, Енисей және Обь секілді өзен жолдарында су көлігін дамытуды қамтитын ұсыныстар әзірлеу жоспарлануда.
Бастама аясында Байкал–Амур магистралін және Транссібір магистралін ауқымды жаңғырту жалғасады. Бұл бағыттар Шығыс полигонының негізін құрайды және елдің шығысындағы ең маңызды жүк инфрақұрылымы саналады. Қазір олар көмір мен басқа да шикізат түрлерінің белсенді тасымалына байланысты өткізу қабілетінің шегінде жұмыс істеп тұр. Үкімет құжатына сәйкес, бұл желілерді жаңғырту 2035 жылға дейін жалғасады, бірақ мерзімдер белгілі бір факторларға қарай түзетілуі мүмкін.
Солтүстік теміржолдарды дамыту Сібір, Орал және елдің солтүстік-батыс аймақтарына Арктика порттарына тікелей қол жеткізуге мүмкіндік береді. Бұл Транссібір магистралына түсетін жүктемені азайтып, теңіз тасымалының әлеуетін толық пайдалануға жол ашады. Арктика полигонын дамыту жобасы аясында Ямало-Ненец автономды округі мен Коми Республикасының аумағындағы Солтүстік теміржол инфрақұрылымын жаңарту да қарастырылған.