Көмір тасымалы: Вагондар тапшылығы жоқ
«Қазақстан теміржолшысы» газетінің тілшісі
Санаулы күннен соң жылу беру маусымы басталады. Осы ретте жылыту маусымына қажетті көмір тасымалын қамтамасыз етіп отырған теміржол саласына жүктелетін жауапкершілік жоғары. Бүгінде қатты отын тасымалы «Қазақстан темір жолы» ұлттық компаниясы тарапынан ерекше бақылауға алынған.
«ҚТЖ-Жүк тасымалы» ЖШС мамандарының айтуынша, қатты отынды тиеуге вагондар бірінші кезекте берілуде. Өңірлерде көмірді жеткізу жүк алушылардың өтініштеріне сәйкес жүзеге асырылуда. Осы арада тасымалды ұйымдастырушы мамандар республика бойынша жылжымалы құрамның жетіспеушілігіне немесе жүк жөнелтушілердің таласуына қатысты ешбір деректің тіркелмегенін айтып отыр.
Өткен сегіз айда жылу электр орталықтарына 43,1 млн тоннадан астам көмір жеткізілген. Бұл былтырғы есепті мерзім көрсеткішінен 950 мың тоннаға артық болып отыр. Осылайша, еліміздің ЖЭО қоймаларында көмір қоры Энергетика министрлігі белгілеген қор нормаларынан екі еседей жоғары болып отыр.
Ал биылғы мамыр-қыркүйек айлары аралығында республика бойынша 3,2 млн тонна коммуналдықтұрмыстық көмір тасымалданыпты. Соның 17,6 мың тоннасы Қарағанды облысына қарасты Ботақара станциясынан тиелген. Оның 7,6 мың тоннасы немесе станциядан 43 пайызы халыққа, қалғаны өнеркәсіптік кәсіпорындарға жеткізілген. Мамандар, жыл сайын Ботақара станциясынан теміржол көлігіне тиелетін коммуналдық-тұрмыстық көмірдің үлесі жалпы тасымал көлемінің 0,005% құрап отырғанын айтады. Станцияда аталған әлеуметтік жүк түрі Кузнецкий және «SatKomir» МК» АҚ разрезінен тиеледі.
Ағымдағы жылдың қыркүйек айындағы жағдай бойынша, разрездерден 14,1 мың тонна қатты отынды тиеу жоспарланса, соның аталған айдың 27 күнінде 11 мың тоннасы тиеліп, жөнелтілген. Қазір станцияда көмір тиеу үшін 65 вагон дайын тұр. Әзірше, жүк жөнелтушілерден басқа өтініштер түспепті. Негізі коммуналдық-тұрмыстық көмір тасымалы вагондармен толық қамтамасыз етіліп отыр. Жалпы жыл соңына дейін ай сайын 9,5 млн тонна көмірді тасымалдау көзделіп отыр. Ағымдағы жылы барлығы 106 млн тоннадан астам көмірді темір жол көлігімен тасымалдау жоспарланса, оның ішінде қазақстандық тұтынушылар үшін 76 млн тоннасы жеткізілмек.