Тораптық станцияларда жұмыс қызған

Ел шығысында жүк пойыздарын құрастырып, кезекті рейске аттандыруда жүргізілетін жұмыстарды жүйелендіру үшін жыл басында бірқатар шаралар қабылданған еді. Соның ішінде, вагондарды дер кезінде жинап, ауыр салмақты немесе ұзын жылжымалы құрамдарды бөгелтпей жөнелту бойынша қолға алынған тың тәсілдер тиімділігін дәлелдеді. Семей ЖТ бөлімшесі бойынша контейнерлік пойыздарды құрастыру мен қабылдап, аттандырып салудағы жұмыстарға баса маңыздылық беріледі. Бұл орайда бөлімшедегі жүк станцияларында әр контейнері 40 тоннаны құрайтын 500-ден аса транзитті пойыздарды іркіліссіз өткізуге болатыны дәлелденген. Сондықтан да жоспарлы шаралар қолға алынған еді. Басты мақсаттардың бірі контейнерлік жылжымалы құрамдардың жылдамдығын азайтпау болып отыр. Осы орайда межелі шаралар толық орындалуда. Мәселен, өткен бес айдың ішінде кестеден кешіктірілмеген 326 контейнерлік пойыздың жылдамдығы 368,7 км/ тәулікті қамтыпты. Бұл – нәтижелі көрсеткіш. Жалпы, жыл басынан бергі 5 айдың ішінде бөлімше бойынша әсіресе қозғалыс шаруашылығында ілкімді жұмыстар жүргізілді. Бірінші кезекте жоспар бойынша қолға алынған шара жүк айналымын арттыру мақсатында вагондардың бос уақытын қысқарту және локомотивтерді ұтымды пайдалануды қалыптастыру болды. Осы себепті әсіресе ірі тораптық станциялардағы маневрлік жұмыстар, жүк пойыздарын құрастыруға баса мән берілді. Осы орайда бөлімше бойынша пойыздарды құрастырып, рейске шығаруда кедергі жоқ. Уақытында жинап алынатындықтан вагондар да жеткілікті. Мәселен, бөлімше бойынша осы кезеңге дейін 444 ұзын жылжымалы құрамдар мен 32 аса ауыр салмақты пойыздар жолға шығарылыпты. Әйтсе де, пойыздарды қабылдап жөнелтуде біршама кедергілер де бар. Мәселен, карантиндік шектеулерге байланысты Қытай елімен шекарадағы «Достық» станциясында кейбір пойыздар қабылданбаған. Сондай-ақ, жоспардағы 151 рейстік пойыздың орнына 109 пойыз жөнелтіліпті. Бірақ, бұл олқылықтар күзгі жүк тасымалының артуымен қалпына келеді деп күтілуде. Себебі, жазғы мезгілдегі жүк айналымының күрт артып, динамикалық жүктемедегі көр- сеткіштердің жоғарылай бастауы осыған дәлел болып отыр. Сонымен қатар, бұл шаралардың сыртында локомотивтердің өнімділігі мен телімдік жылдамдықтың да артуы байқалады. Дегенмен алдағы уақыттарда күш салу қажет мәселелер жетерлік. Мәселен, техникалық жылдамдықты әлі де арттыра түсу, пойыздардың жол жүру жылдамдығына мүмкіндігінше шектеу қоймау шаралары межеленіп отыр. Қалай болған күнде де бөлімшедегі қозғалыс саласында өндіріс барысын ұлғайтуға күш салынуда. Қазіргі күндері семейлік теміржолшылар жыл аяғына дейінгі орындалуы тиіс межелі шараларды қабылдап, жүзеге асыруға қызу кірісуде. Атап айтсақ, эксплуатациялық жұмыстар бойынша өткен 5 айдың ішінде толық орындалмаған көрсеткіштермен шындап жұмыс жасау қажеттілігі туындап отыр. Аталмыш тарапта кешенді жұмыс жүргізу керек. Жоспарлы іс-шаралар қатары қазіргі күннен бастап пысықталуда. Соның бірі ретінде, жергілікті Қаражыра көмір кенішінен тасымалданатын қатты отын көлемін 9 мың тоннаға жеткізу көзделіп отыр. Осылайша, контейнерлік пойыздарды іркіліссіз өткізу мен ауыр салмақты жылжымалы құрамдарды жолға шығару мақсатында тораптық станциялардағы өндіріс бойынша технологиялық процестерге баса мән берілуде.