Шығыста 6300 тонналық жүктерді сүйрейтін пойыздар саны көбейді
Абай облысы бойынша меншікті тілші
Ел шығысында теміржол қозғалысы бойынша жүк айналымы жыл санап артып келеді. Әсіресе көмір мен астық тасымалы кезінде жиі құрастырылатын, салмағы 6300 тоннаға дейін жететін жылжымалы құрамдар көрсеткішті еселеуде, деп хабарлайды Rail-news.kz. Семей ЖТ бөлімшесінің теміржолшылары үшін қауырт кезең енді басталды. Өткен тамыз айынан бастап еселенген жүк тиеу, түсіру жұмыстары бірқатар тың шаралар қабылдауға мәжбүр етуде. Бұл бағытта әсіресе қозғалысшылар қауымына айтарлықтай жауапкершілік жүктелуде. Мәселен, ағымдағы жылдың 8 айында жалпы саны 692 ұзын жылжымалы құрамдар құрастырылса, 66 ауыр салмақты жүк пойыздары жолға шығарылыпты. Бұл межеге алға қойылған тапсырмалардың жүз пайыздан артық орындалуы мен тасымал барысында тың әдіс-тәсілдерді қолдану және жүк жөнелтуге тапсырыс берушілер санының өсуі әсер етіп отыр. Дегенмен карантиндік шектеулердің жеңілдеуімен бірге орын алатын қауырт жүк тасымалына семейлік теміржолшылар қауымы толықтай даяр болып шықты. Тонналық есеппен алғанда жүк тиеу ісі техникалық жоспар бойынша 107,1 пайызға артып отыр. Оның ішінде Дегелең станциясынан тиелетін Қаражыра көмірі мен ауыл, Белағаш станцияларынан артылатын астық және Жаңғызтөбеден тиелетін түсті металл рудасының үлесі аса қомақты. Бұрынғы жылдардағыдан бір айырмашылық, жүк ай- налымын арттыру үшін осыған дейін тәжірибеден өткен Шаттл пойызы соңғы жылдары құрастырылып жүрген жоқ. Оған себеп, жүк тасымалы бойынша бұл бағыттағы жоспарлар бүгінгі таңда жүз пайыз орындалған. Осы ретте, Дегелең-Семей телімі бойынша 6 300 тонналық пойыздар қалыптастырылса, Локоть-Ақтоғай станциялары аралығында 4 500 тонна болатын ауыр салмақты пойыздар кідіріссіз тікелей қатынауда. Тағы бір айта кетер жайт, мұндай ерекше санаттағы пойыздар саны ағымдағы жылы өткен жылмен салыстырғанда біршама артып отыр. Нәтижесінде пойыздың орташа салмағы 101,0 пайызға арттырылған. Әйтсе де, жүк айналымын ұйымдастыру бойынша жыл соңына дейінгі көзделген техникалық жоспарлар көлемі тым ауқымды. Себебі, қатты отынға сұраныстың еселеп артуына орай көмірді 9,0 млн тоннаға жеткізу негізгі міндеттер қатарында тұр. Осы ретте аталмыш тапсырманы орындауда ауыр салмақты пойыздар бірінші кезекте көмекке келері – анық жайт.