Маңғыстау магистральдық желі бөлімшесінің машинист-нұсқаушысы Қайрат Абдашов қауіпсіздіктің іс-қимыл диалогы жүйесі мобильдік қосымшасына теміржолдағы өзі куә болған қателіктер мен кемшіліктерді тіркеп, олардың дер кезінде жойылуына үлесін қосты. Нәтижесінде бір жылда үш рет материалдық ынталандыруға ие болды. Ал жыл қорытындысы бойынша 3 миллион сыйақы алады.
Цифрлы технологияның арқасында теміржолдағы өндірістік қауіпсіздік қызметін жетілдіру мақсатын көздейтін бағдарлама бойынша оған тіркелген әрбір теміржолшы ревизор қызметін атқара алады. Тек ынта-ықылас және өз саласына деген жанашыр көзқарас болса жеткілікті.
– Өндірістік қауіпсіздік бағдарламасы бойынша мобильдік қосымша пайда болғанда қатты қуандым. Енді әрбір теміржолшы қауіпті жағдайдың алдын алуына болады. Форумға қатысу барысында жаңа жүйенің критерийлерімен егжей-тегжей таныстым. Бұл деген өз саласының жанашыры болып табылатын әрбір теміржолшы үшін үлкен мүмкіндік екеніне көз жеткіздім. Өткен жылдың қаңтар айынан бастап мобильдік қосымшаға тіркеліп, күнделікті жұмыста жүріп өзім көрген кем-кетіктерді жіпке тізгендей етіп жібере бастадым. Ақпан айында 130 айлық есептік көрсеткіш мөлшерінде сыйақы алдым. Бұл мені одан сайын ынталандыра түсті. Жүрген жерімде әрнәрсенің дұрыс-бұрысына мұқият қарайтын болдым. Қателік болса алдымен сол жерге жауапты адамға ескертіп, кейін оны жүйеге тіркеймін. Және орындалуын қадағалаймын. Осылай өткен жылы 71 кемшілікті бағдарламаға енгіздім. Оның бәрі де өз деңгейінде ретке келтірілді. Ішінде елеулі кемшілік пен қателік те, жай ғана ескертумен түзелетін олқылықтар да болды. Бірақ бағдарламаның да мақсаты сол емес пе, титтей кемшіліктің өзін елемеуге болмады, ертеңгі күні ол асқынған ауруға айналары сөзсіз, – дейді Қайрат Абдашов.
Жүйеге келіп түскен кемшіліктің бәрі іріктеліп, тіркелген материалдың саны мен сапасы және қауіптілік деңгейіне байланысты бес категория бойынша сыйақы тағайындалады екен. Соның ішінде бесінші категория бойынша іріктеуде Қайрат Абдашов тіркеген кемшіліктердің салмағы басым түсіп, жыл үздігі атанып отыр. Айтуынша, тіркеген кемшіліктер қатарында сынған есіктің тұтқасы, шамы жанып кеткен перроннан бастап, қауіпсіздікке тікелей қатер төндіріп тұрған күрделі ақаулар да табылған. Теміржол техникасының платформасында тесік, баспалдағы сынып қалған сияқты жағдайлар да кездескен.
– Өткен жыл қорытындысы бойынша Әскерилендірілген темір жол күзетінің қызметкері осы жобаның жеңімпазы болды. Ол жыл бойы қауіпсіздікке нұқсан келтіретін 55 жағдайды тіркеп қана қоймай, оның бірнеше учаскеде қайталанатынын айтып, айлық өткізу туралы ұсыныс берген еді. Қайрат та мердігер мекемелер жұмыс істеген кезде қауіпсіздік шараларын сақта- майтынын, талаптар орындалмайтынын айтып, бас инженерге рапорт жазды. Әріптесіміздің тапқандарының барлығы дерлік күрделі ақаулар. Оның бәрі сайып келгенде адам өміріне қауіпті. Сондықтан ешқайсысына жай көзбен қарауға болмайды, – дейді Маңғыстау магистральдық желі бөлімшесінің еңбекті қорғау және экология секторының бастығы Тлектес Кундыбаева.
Жуырда Қайрат Абдашовты бөлімше басшылығы арнайы қабылдап, қауіпсіздікке қосқан үлесі үшін алғыс айтты және оның ісін көпшілікке үлгі етті.
