Алғашқы тоқсанда Магистральдық желі дирекциясы жарақаттан дін аман шықты
«Қазақстан теміржолшысы» газетінің тілшісі
Магистральдық желі дирекциясы теміржолшылардың денсаулығы мен өмірін сақтауға, еңбек қорғау мен қауіпсіздік деңгейін арттыруға жыл сайын 5,5 млрд теңгеден астам қаржы бөледі. Демек, осыншама сомаға жыл сайын қауіпсіз еңбек және санитарлық-гигиеналық жағдай жасау бағытында шаралар атқарылады деген сөз.
Нәтижесі қандай десек, биылғы жылдың алғашқы тоқсанында дирекцияның желілік кәсіпорындарында бірде-бір өндірістік жарақаттану оқиғасы орын алмағаны ауызға алынады. Ал өткен жылы осы кезеңде 5 жазатайым жағдай тіркелген. Бұл туралы жуырда Еңбек қорғау күніне орай өткен жиында Еңбек қорғау және қауіпсіздік, өнеркәсіптік қауіпсіздік және экология департаментінің директоры Е.Сәкенов мәлімдеді. Ол әріптестерін нөлдік жарақаттануға қол жеткізуге атсалысуға шақырды. Мысалы, 20 жылдан астам уақыт өндірісте жарақаттануға жол бермей жұмыс істеп жатқан кәсіпорындар баршылық. Айталық, ШЧ-17 Атбасар, ШЧ-13 Жаңаесіл, ШЧ-26 Қостанай, ШЧ-22 Жаңаарқа, ШЧ-23 Балқаш, МБ Қарағанды, ВП-21 Жаңаарқа, НОРП-13 Қарағанды, ПЧ-39 Семей, ШЧ-30 Аягөз, ШЧ-8 Атырау, ШЧ-9 Ақжайық, ШЧ-11 Құлсары, ВП-9 Атырау, НОРПОЖ-11 Атырау филиалдары алдыңғы лекте аталады. Міне, осы деректен-ақ, техникалық және нормативтік мүмкіндіктердің тең жағдайында қауіпсіз еңбек жағдайларын қамтамасыз ете отырып, өндірістік жарақатсыз жұмыс істеуге болатынын байқаймыз. Бүгінгі таңда жалпы компания бойынша еңбек қорғауды басқару жүйесін трансформациялау бойынша жұмыстар жүргізіліп жатыр. Дирекция 2019 жылы нөлдік жарақаттануға қол жеткізу бойынша стратегия қабылдап, жұмысшылардың еңбек мәдениетін және қауіпсіздікті сақтап, қолайлы ортада жұмыс істеу тек өздеріне байланысты екендіктеріне мән беруге шақырды. Алайда, өндіріске жаңа, заманауи және қауіпсіз технологиялардың енгізіліп жатқанына қарамастан, дирекция филиалдарында адам шығыны да жоқ емес. Айталық, 2010-2022 жылдар аралығында 48 қызметкер жұмыс орнында қаза тауып, 57 адам мүгедек болып қалған.
– Жазатайым оқиғаларға жүргізілген тергеу-тексеру, өндірістегі адам өлімі, жұмыс берушілер, өндіріс басшылары және зардап шеккендер тарапынан немқұрайлылық, жауапсыздық, қауіпсіз еңбек жағдайларын жасауға салғырттықпен қараудың салдары екенін көрсетіп отыр. Жұмыс берушілер мен қызметкерлер қауіпсіздік мәдениеті сақталмай, өндірістік жарақаттануды жою мүмкін емесін түсінулері керек. Ал қауіпсіздік мәдениетін біз Қазақстан Республикасының еңбек заңнамасымен реттелетін белгіленген қауіпсіздік ережелерін қатаң сақтағанда ғана қалыптастыра аламыз, – деді Еркен Сакенов.
Магистральдық желі дирекциясының бас инженері Қайырбай Орынбаев еңбек қорғаудың жоғары мәдениетін қалыптастыру үшін басты қажет дүние, ол сенім мен өзара құрметке негізделген ашық ақпарат алмасу және жауапкершілік екенін мәлімдеді. Ал жауапсыздық – қашан да жарға жығатыны дәлелденген аксиома.