«Қазақстан-Түркіменстан-Иран» темір жолының әлеуеті зор – Президент
«Қазақстан теміржолшысы» газетінің тілшісі
Өзбекстанның Самарқанд қаласында өткен Шанхай ынтымақтастығы ұйымына мүше мемлекеттер басшылары кеңесінің отырысында Қазақстан Президенті Қасым-Жомарт Тоқаев транзиттік-көлік секторын дамытуға байланысты пікірін білдірді.
Президент ШЫҰ аясында ауқымды экономикалық жобаларды жүзеге асыруға байланысты ойын білдіре келе, экономикалық ынтымақтастықтағы басым бағыттардың бірі ретінде транзиттік-көлік секторын атады. Ал ШЫҰ елдерінің тиімді экономикалық және көлік дәліздерін дамыту жөніндегі Ынтымақтастық тұжырымдамасының қабылдануы өзара логистикалық байланысты жақсартудағы маңызды жетістік деп бағалады.
– Әңгіме «Қытай – Еуропа» бағыты және Транскаспий халықаралық көлік бағдары бойынша теміржол тасымалы, сондай-ақ Қазақстан мен Қытай шекарасында үшінші теміржол өткелінің құрылысын салу жоспары туралы болып отыр. Осыған орай, мен ШЫҰ-дағы серіктестерді жаңа мүмкіндіктерді пайдалануға шақырамын. Шығыс Азиядан Парсы шығанағы елдеріне шығатын ең қысқа «Қазақстан-Түркіменстан-Иран» темір жолының әлеуеті зор. Қазақстан мен Орталық Азия мемлекеттері арасындағы транзиттік-көлік ынтымақтастығы қарқынды дамып келеді. Біз Орталық және Оңтүстік Азия арасындағы көлік бағыттарын кеңейту, «Солтүстік-Оңтүстік» және «Шығыс-Батыс» трансеуразиялық дәліздерін дамыту жөніндегі іс-әрекеттерді қолдаймыз. Жаңа мультимодальды көлік дәліздері мен логистикалық орталықтарды ашуға және қолданыстағыларын жаңғыртуға мүдделілік танытамыз, – деді Қасым-Жомарт Кемелұлы.
Сондай-ақ, ШЫҰ саммиті аясында Мемлекет басшысы Иран Ислам Республикасының Президенті Ибрахим Раисимен кездесті. Кездесуде транзиттік жүк тасымалын одан әрі ұлғайту мақсатында «Қазақстан-Түркіменстан-Иран» теміржолының әлеуетін дамыту мен Каспий маңы елдерінің порттары арасындағы тұрақты паром қатынасының мүмкіндіктерін пайдалану қажеттігі атап өтілді.