Тежегішті дұрыс қолдануға арналған тәжірибелік сабақ өтті
Атырау облысы бойынша меншікті тілші
Қозғалыс қауіпсіздігін сақтауда пойыздар тежегішін дұрыс қолдана білудің маңызы зор. Жуырда сол мақсатта Атырау локомотив пайдалану депосында вагон пайдалану депосы мамандарымен бірлескен «Тежегіш жабдығына – ерекше бақылау» атты айлық аясында практикалық сабақ өтті.
Оған Ганюшкино, Атырау, Ақжайық, Махамбет, Мақат, Сағыз, Құлсары өндірістік-техникалық қызмет көрсету пункттерінің басшылары, нұсқаушы, техникалық оқыту шеберлері, слесарь-жөндеуші, аға вагон қараушылар, инженер-технологтары – барлығы 17 адам қатысты. Теориялық сабақ барысында жылжымалы құрамның тежегіштерін пайдалану бойынша нұсқаулықтар, тежегіштерді пойыз жүріп бара жатқанда басқару, станцияларда автотежегішті толықтай тексеріп шығу, стандартты емес жағдайларда локомотив бригдаларының әрекеті қандай болуы керек деген сынды мәселелер айтылып, жан-жақты түсіндірілді.
Ал практикалық сабақ барысында пойыз тежегіштерін бақылап тексеру тәртібі көрсетілді. ТЧЭ-3 және ВЧД-1 мамандары ТЭ33А-0240 сериялы тепловоз кабинасында табло арқылы тежегіштер жұмысының қыр-сырымен танысты.
Атырау локомотив пайдалану депосының нұсқаушылары Б.Жұмалиев пен М.Набиев тежегіштер жүйесінің жұмысын тәптіштеп түсіндіріп, қолмен көрсетіп, сұрақтарға жауап берді. Қысқасы, тежегіш тақырыбын зерттеген сабақ болды.
Нұсқаушылардың айтуынша, бұрынғы ТМ тепловоздары қарапайым, қондырғысы оңай болса, Эволюшн тепловоздары толықтай компьютерлендірілген. Мұнда тепловоздың май деңгейі, шығын, тежегіш жұмысы, басқа да мәліметтерді таблода көрсетіп тұрады. Сондықтан жөндеу жұмыстары да күрделі.
Атырау вагон пайдалану депосының бас инженері Рашид Мұсабаевтың айтуынша, мұндай бірлескен техникалық оқу тұңғыш рет өткізіліп отыр және ол өте қажет дүние. Өйткені пойыз тұрып қалған жағдайда локомотив бригадасы мен вагоншылар комиссия шешімімен оның себебін анықтауға тырысады. Осы тұста әр түрлі пікірлер қайшылығы да туындайды. Өйткені тепловозда да, вагонда да тежегіш болады. Ақау қайсысынан шықты? Міне, осыны анықтау қажет. Ал мұндай практикалық сабақ ақауды тезірек тауып, бірлесе әрекет етуге жұмылдырады. Алдағы уақытта осындай практикалық сабақ Мақат локомотив депосында да өткізілмекші.