Пойызда есірткімен ұсталған азамат 5 жылға сотталды
Өткен жылдың жазында Көліктегі полиция департаментінің қызметкерлері жедел-іздестіру іс-шаралары барысында Өскемен қаласының 29 жастағы тұрғынын анықтап, ұстады. Ол есірткі құралдарын заңсыз сатты деген күдікке ілінген, деп хабарлайды Rail-news.kz.
Жеке тексеру кезінде ер адамның қалтасынан балалар ойыншығына арналған футляр табылып, оның ішінен есірткі затын тұтынуға арналған құрылғы анықталды. Ұсталған азаматтың автокөлігі мен пәтеріне санкцияланған тінту жүргізу барысында марихуана салынған полиэтилен пакеттері тәркіленді. Сараптама қорытындысына сәйкес, алынған есірткі затының жалпы салмағы 30 граммды құрады.
«Бұған дейін қаскүнем есірткі заттарын ақшаға сатқан болатын. Аталған дерек бойынша есірткі құралдарын заңсыз сақтау, тасымалдау немесе сату фактісі бойынша көлік полицейлерімен сотқа дейінгі тергеп-тексеру жүргізілді», - делінген хабарламада.
2025 жылғы 21 сәуірде Өскемен қалалық сотының үкімімен құқықбұзушы 5 жылға бас бостандығынан айырылды.
Үкім заңды күшіне енді.
Еске сала кетейік, жыл басынан бері Көліктегі полиция департаментінің қызметкерлері есірткі айналымына қатысты 152 құқықбұзушылықты анықтады. Оның ішінде 27 сату, 6 аса ірі мөлшерде сақтау және 4 контрабанда фактісі тіркелген.
Заңсыз айналымнан 18 келіден астам түрлі есірткі заттары тәркіленді.