Түрксіб теміржолының 90 жылдығына орай ҚТЖ бейнеролик түсірілмек
«Қазақстан теміржолшысы» газетінің тілшісі
Өткен ғасырдың ұлы құрылысы саналатын Түрксіб теміржолының 90 жылдығына орай «ҚТЖ» ҰК» АҚ арнайы 10 минуттық бейнеролик түсіруді қолға алды. «Түрксіб – жаңа өмірге жол» тақырыбындағы бейнематериал шағын болса да, аңызға айналған халықтық құрылыстың Қазақстанның ғана емес, бүкіл Орталық Азия өміріндегі мән-маңызын ашатындай болуы керек.
Алып теміржол құрылысы туралы көнекөз ардагер теміржолшылардың естеліктері мен әңгімелері жинақталып жатыр.
Осы мақсатта компанияның бас инженері Батыр Котырев өткен жұмада теміржол тарланы, талай жыл қазіргі Алматы, бұрынғы Түрксіб темір жолы бөлімшесінде басшылық қызмет атқарған тарлан теміржолшы Қалтай Сәмбетовпен кездесті.
Болат жолдың бүкіл шежірелі тарихын білетін ардагер Түрксіб теміржолына қатысты басты назар аударатын мәселелерді атапатап айтып берді.
– 20-ғасырдың отызыншы жылдары жалпыхалықтық ұранға айналып, халықтың қажырлы еңбегі, қайрат күшімен салынған Түрксіб теміржолы туралы қалай дәріптесек те жарасады. Қазақтың мидай жазық даласына тыңнан түрен салып, шойын жолдың келуі, шын мәнінде, сол дәуірдің ұлы жаңалығы еді. Оның ғаламаттығы, қуаттылығы, атының өзі аңызға айналған ұлы құрылыс екендігі, сол кездегі қарапайым халықтың маңдай терін тамшылатып жүріп жалаң қолмен салғаны көрініс табуы керек, Түрксібтің ғажайып тарихы келер ұрпаққа жетуі керек. Өйткені, бұл жол экономиканың драйвері болған және болып та қала береді, – деді Қалтай Сәмбетов ақсақал.
Сонымен қатар, ол қазір кейбір тұлғалар ұсыныс етіп айтып жүргендей, Луговой станциясына сол жылдары құрылысты басқарған жеке тарихи тұлғалар есімін беру ағаттық екенін жеткізді. Себебі, Түрксіб бүкілхалықтық құрылыс болды, оған барша елдің еңбегі бірдей сіңген. Әрі темір жолдың тарихында бірде-бір станцияға жеке адамның аты берілген емес, – дейді ардагер.
Ал ұлттық компания қолға алған бейнеролик алдымен «Түрксіб дегеніміз не?» деген шағын сауалнамамен басталады.
Бұл сауалнамаға көшеде өтіп бара жатқан кез-келген адам тартылады. Одан әрі Түрксібтің Орталық Азия мен Қазақстан үшін, соның ішінде ұлттық кәсіби мамандарды қалыптастырудағы маңызы сипатталады.
Бұл ретте құрылыс жұмыстарын басқарған Тұрар Рысқұлов, Мұхамеджан Тынышпаев туралы деректер де келтіріледі.
Аталған мәліметтер тарихи хроникамен қоса инфографика, темір жолдың анимациялық картасын көрсету арқылы келтіріледі.
Содан соң Түрксіб құрылысын салушылардың ұрпақтарынан естеліктер алынады. Олардың ішінде Түрксібтің белгілі құрылысшысы Ахметжан Мәженовтің немересі пікір білдіреді. Сонымен қатар құрылыс тарихынан көрнекі сандар тізбектеліп, диаграммалар көрсетіледі.
Одан әрі атақты теміржол құрылысын жүргізу барысындағы қызықты деректер архивтік бейнежазбалар, сол кездегі газеттерден үзінді келтіру арқылы беріледі.
Сондайақ ұрпақтар сабақтастығы ретінде аға буыннан Қалтай Сәмбетов, ал қазіргі темір жол желісінің дамуы туралы ұлттық компанияның бас инженері Батыр Котырев пікір білдіреді. Ролик соңы ҚТЖ компаниясының бүгінгі ғаламат өзгерістері мен жетістіктеріне арналады.
Оның бейнекадрларына компанияның заманауи нысандары мен жас теміржолшы белсенділер тартылады.