Интенсивті тренингтер онлайн-режимінде өтуде
«Қазақстан теміржолшысы» газетінің тілшісі
«ҚТЖ» ұлттық компаниясында «Нөлдік жарақаттану» стратегиясын іске асыру шеңберінде «ҚТЖ-Жүк тасымалы» АҚ қызметкерлері «Қауіпсіздіктің мінезқұлық диалогы», «Жұмысты тоқтату», «Салдарсыз оқиғалар» тақырыптары бойынша еңбекті қорғауды басқару саласындағы құзыреттерді арттыру бойынша оқыту семинарларын ұйымдастыруда.
Интенсивті тренингтер онлайн-режимінде өтуде. Вебинарлар барысында PowerPoint-таныстырылымдар, бейне-фотоматериалдар көрсетіледі. Қатысушылар нақты уақыт режимінде чатта оқытушыларға сұрақтар қою мүмкіндігіне ие.
«Қауіпті жұмысты тоқтату – бұл оқиғаның алдын алу, демек, ауыр жарақаттар мен өлім-жітімнің алдын алу мүмкіндігі», – дейді семинарды ұйымдастырушылар. Олардың алдында «Нөлдік жарақат» Vision Zero тұжырымдамасының талаптарын сақтай отырып, теміржолшыларды өзін-өзі ұстауын, яғни іс-әрекетін ынталандыру міндеті тұр. Осы ретте, мінез-құлық қауіпсіздігі диалогы екі маңызды аспектіні қамтитынын айтар едік.
Біріншісі, кадрлардың кәсібилігі. Өндірістердегі технологиялық процестер үнемі жетілдіріліп отырады, мұндай жағдайда тек кәсіби мамандар ғана сапалы және сенімді жұмыс істей алады. Алайда, олар да кейде қателіктер жіберіп алады.
Міне, осындай жазатайым оқиғалардың барлық фактілерін талдай келе «ҚТЖ» ҰК» АҚ өндірістік қауіпсіздік және экология департаменті, көптеген оқиғалар, жарақаттар мен апаттар, шын мәнінде, жағдайлар мен жабдықтарға байланысты емес, адамдардың қауіпті әрекеттері мен жүріс-тұрысы салдарында орын алып жатады деген қорытындыға келді.
Екінші аспект – ол қауіпсіз жүріс-тұрысты ынталандыру. Осы ретте, ұлттық компанияда «Мінез-құлық диалогтары» – «Өндірістік қауіпсіздік» модулінде қызметкерлерге арналған мобильді қосымша әзірленген болатын. Ол еңбек қорғау саласындағы ықтимал тәуекелдерді жедел хабарлап, басшылықтың әрекет етуіне, сондай-ақ қауіпті жағдайларды жою жөніндегі шаралардың орындалуын бақылауға мүмкіндік береді. Яғни, әрбір қызметкер қауіпті әрекеттер мен жағдайлар туралы хабарлап, қауіпті жұмысты тоқтату қажеттілігі туралы мәлімдей алады, ол үшін оқиғаны мобильді қосымша арқылы автоматтандырылған жүйеге енгізу жеткілікті.
Әрі қарай оқиғаны басшылық бақылауына алып, кемшіліктерді жою және болашақта оны қайталамау үшін шаралар қабылданатын болады. Мобильді қосымша арқылы фото/бейнефайлдарды онлайн режимінде жіберуге болады. Қызметкердің денсаулығына немесе өміріне қауіп төнгені туралы және сол учаскедегі жұмысты тоқтату немесе шара қабылдау үшін хабарламаны жасырын түрде хабарлауға да болады. Теміржолшыларға арналған мобильді қосымшаны пайдаланғаны үшін 4-тен 130 АЕК-ке дейін ынталандыру сыйақысы қарастырылған.