Өндірісте зардап шеккендерге 30 млн теңгеде дейін өтемақы төленеді
«Қазақстан теміржолшысы» газетінің тілшісі
Мемлекеттік органдар мен жұмыс берушілер еңбекті қорғау саласында қабылдап жатқан кешенді шаралар өндірістік жарақаттарды азайтуға мүмкіндік беріп отыр. Соңғы жылдары елімізде жарақаттану саны 15 пайызға төмендеген. «Қазақстан темір жолы» ұлттық компаниясының жұмысшыларымен арадағы Ұжымдық келісімшарты негізінде өндірісте бақытсыз оқиғаның құрбаны болып, жазатайым жапа шеккендердің жағдайы қараусыз қалмайды. «Қазкөліккәсіп» ҚБ төрағасының орынбасары Жұпарбек Сәбитовтің айтуынша, бір теміржолшы жұмыста жүріп жазатайым оқиғадан қайтыс болып кетсе, заң және ұжымдық шарт бойынша оның отбасына келтірілген шығын төленеді.
– Өндірісте жіберілген қателіктің кесірінен көз жұмғаны нақты дәлелденсе, қайтыс болған теміржолшының отбасына компания оның 10 жылдық жалақысын немесе 10 мың АЕК көлемінде ақы төлейді, бұл дегеніміз – бүгінгі күнде 30 млн теңге. Ал 1,2-топтағы мүгедек болып қалса, соның жартысын, яғни 15 млн теңге төлейді. 3-топтағы мүгедек болса, 3 жылдық жалақысы төленеді. Сондай-ақ одан бөлек бір саусағын жоғалтып алу сияқты басқа да жұмысқа қабілеттілігі азаятын болса, оған қосымша 1 жылдық жалақысы төленеді, бұл ретте ол әрі қарай жұмысын жалғастыра береді, – дейді Ж.Сәбитов.
Оған қосымша, мүгедектерге көрсетілімі бойынша медициналық әлеуметтік сараптама комиссиясы шешім шығарады. Мысалы, аяғын кесіп кетсе, оған мүгедектігіне байланысты 10 жылға бір машина компания есебінен сатып алынып беріледі. Жағдайы болмаса комиссия шешімімен арба сатып алып береді. Сонымен қатар протезіне ақша, кей жағдайларда азық-түлікке, сосын алған жарақатына байланысты көзіне, барлық органдарына керек заттары бойынша көмек көрсетіліп отырады.