ҚТЖ «Нұрлы жол – Арқалық» пойызының қатынау мерзімін жыл соңына дейін ұзартты
Жолаушылардың сұранысын ескере отырып, Ақмола және Қостанай облыстары тұрғындары үшін теміржол қатынасының қолжетімділігін арттыру және сапарға қолайлы жағдай жасау мақсатында «Жолаушылар тасымалы» АҚ №225/226 «Нұрлы жол – Арқалық» жолаушылар пойызының қатынау мерзімін 2026 жылдың соңына дейін ұзарту туралы шешім қабылдады, деп хабарлайды Rail-news.kz.
«№225/226 «Нұрлы жол – Арқалық» пойызы бастапқыда жолаушылар ағынын зерделеу үшін тамыз айының соңына дейін сынақ тәртібімен іске қосылған болатын. Азаматтардан түскен өтініштер мен қалыптасқан сұранысты талдай келе, пойыздың қатынауын жыл соңына дейін жалғастыру туралы шешім қабылданды. Бағыттың тағы бір ерекшелігі – пойызда Starlink технологиясы арқылы спутниктік интернеттің іске қосылуы. Ал пойыздың қолайлы жүру кестесі жолаушыларға өңірлер арасындағы сапарын ыңғайлы жоспарлауға мүмкіндік береді. Бұл шешім, ең алдымен, тұрақты көлік қатынасын сақтауға және жолаушылар үшін теміржол қызметінің сапасы мен қолжетімділігін арттыруға бағытталған», — деп атап өтті, «Жолаушылар тасымалы» АҚ Басқарма төрағасы Әнуар Ахметжанов.
Жолаушыларды тасымалдау 2024 жылы шығарылған RWS Wagon жаңа вагондарымен жүзеге асырылады. Пойыз құрамында 3 купе және 3 плацкарт вагоны бар. Бір бағытта 250-ден астам жолаушыны тасымалдауға мүмкіндік береді.
Вагондар жолаушылардың қауіпсіздігі мен жайлылығына қойылатын заманауи талаптарға сай жабдықталған. Вагондарда ыңғайлы жатын орындар, жеке жарықтандыру шамдары, USB порттары және электр розеткалары қарастырылған. Вагондардың қызмет ету мерзімі 40 жылға дейін.
Пойыз күнара қатынайды. Бағыт бойынша пойыз Нұрлы жол, Жалтыр, Атбасар, Жақсы, Есіл, Державинск, Арқалық және басқа да станцияларда аялдайды.
Жол жүру билеттерін bilet.railways.kz ресми сайтынан және «Жолаушылар тасымалы» АҚ билет кассаларынан сатып алуға болады. Қосымша ақпаратты 1433 тегін нөмірі арқылы немесе «Жолаушылар тасымалы» АҚ-ның Instagram желісіндегі @jolaushylar_tasymaly ресми парақшасында қолжетімді.